Русија има интерес да продолжи непрекинат проток на гас кон Европа, а доколку има некакви ризици од прекин на транзитните текови низ Украина, тогаш Украина ќе биде одговорна за тоа, соопшти руското Министерство за енергетика, цитирано од „Bloomberg“.
„Би сакале да нагласиме и предупредиме дека какви било прекини или провокации на пумпните станици се област за која се одговорни украинските власти“, изјави рускиот заменик министер за енергетика Павел Сорокин.
Украинската компанија за пренос на гас „LLC Gas TSO“ ја предупреди руската енергетска компанија „Газпром“ во писмо дека гледа ризици за транзитот на руски гас во Европа, рече Сорокин. Во писмото се наведени четири пумпни станици долж транзитната рута каде може да има прекини, додаде тој.
„Меѓутоа, руската војска контролира само две од нив и може да ја гарантира нивната безбедност. Така, ризиците од прекин постојат само за другите две станици, кои се контролирани од Украина“, рече Сорокин.
Изјавата на рускиот заменик-министер за енергетика ги одразува стравувањата на европските земји од можното нарушување на снабдувањето со гас на Русија.
Руската Федерација е одговорна за околу 30% од испораките на природен гас во Европа, при што таа сака да ја намали зависноста од рускиот гас преку алтернативни извори и преку подобрување на ефикасноста и користењето на повеќе обновливи извори на енергија.
Претходно во средата, портпаролот на Кремљ, Дмитриј Песков, рече дека Русија може да ги преиспита своите обврски за снабдување со енергија во светлината на санкциите воведени по нејзината инвазија на Украина. Претходно, вицепремиерот Александар Новак предупреди дека Русија може да го прекине снабдувањето преку постојниот гасовод „Северен тек 1“ до Германија.
Протоците на рускиот гас низ Украина продолжуваат во согласност со транзитниот договор и во средата надминаа 109,5 милиони кубни метри дневно. Вкупните текови од Русија до границите на Европската унија (ЕУ) закрепнаа во последните неколку недели од најниските нивоа на почетокот на годината.
