Од ноќеска на полноќ повисоки цени на горивата

Горивата од ноќеска на полноќ поскапуваат 1,5 денар за литар, одлучи денеска Регулаторната комисија за енергетика и водни услуги (РКЕ). Со одлуката се врши зголемување на малопродажните цени на нафтените деривати во просек за 1,93 отсто.

Новата малопродажна цена на „евросупер БС-95“ изнесува 84 денари за литар, „евросупер БС-98“ ќе се продава за 86, а „евродизелот“ (Д-Е V) за 75,5 денари за литар. Малопродажната цена на екстра-лесното масло за домаќинство (ЕЛ-1) се зголемува еден денар за литар и ќе чини 74,5 денари.

Со одлуката на РКЕ малопродажната цена на мазутот М-1 НС се зголемува 1,249 денар за килограм и ќе изнесува 48,17 денари.

Како причина за зголемувањето на малопродажните цени на нафтените деривати од РКЕ ги посочуваат зголемените референтни цени на нафтените деривати на светскиот пазар во изминатите седум дена, и тоа во просек за 2,711 отсто кај бензинот и за 1,997 отсто кај дизелот, како и за 0,496 отсто повисокиот курс на доларот во однос на денарот.