Жителите на градовите можеа да ја видат иднината поради ограничувањата околу пандемијата на коронавирус – загадувањето на воздухот е намалено, помагајќи да се спасат животите на стотици луѓе. Но, чистиот воздух го зголемува притисокот врз локалните власти да ги засилат напорите за заштита на животната средина и одржливиот развој, пишува европското издание „Politico“.
Според податоците објавени во списанието „Nature“, само во Европа, намалувањето на загадувањето спасило 823 луѓе. И ова се само избегнатите смртни случаи од краткотрајна, а не хронична изложеност на нечист воздух.
Пандемијата им покажа на Европејците каква може да биде иднината на урбаната мобилност и им се допадна она што го видоа, рече градоначалникот на Брисел, Филип Клоус.
„Оваа пандемија може да биде можност. Изгледа страшно да се каже дека по социјалната, здравствената и човечката трагедија што ја доживеавме за време на пандемијата, со милиони умрени, но тоа навистина е можност“, рече тој.
Во Брисел многу луѓе пешачеа или возеа велосипеди. Затоа локалните власти одлучија да ги прошират пешачките површини и велосипедските патеки, како и да го зголемат јавниот превоз. Низ градот, брзината беше ограничена на 30 km/h.
Жителите на главниот град на Белгија го променија начинот на движење и ова е вистински успех.
„Навистина чувствуваме дека има голема општествена промена“, рече Клоус.
Бројките за намалена смртност се базираат на анализи на 47 големи европски градови. Сценаријата вклучуваат временски услови како и други елементи. Научниците ги разликуваат ефектите од долгорочната и краткотрајната изложеност на загаден воздух бидејќи тие имаат различни ефекти врз човечкото тело. Хроничната изложеност на нечист воздух е поврзана со кардиоваскуларни болести, рак на белите дробови и други респираторни заболувања.
Други студии, исто така, го поврзуваат почистиот воздух за време на пандемијата на коронавирус со избегнување на многу предвремени смртни случаи, пишува „Politico“.
Нечистиот воздух во Европа е најголемата природна закана за луѓето – 400.000 луѓе годишно умираат од последиците на загадувањето.
