Транспортниот гигант „A.P. Moller-Maersk“ ги предупреди своите клиенти дека сè уште има проблеми со снабдувањето со стоки ширум светот.
Според данската компанија, ослободувањето од „сообраќајниот метеж“ во пристаништата и логистичките терминали трае подолго од очекуваното.
Пандемијата предизвика недостиг на контејнери за транспорт и метеж во пристаништата, што значи дека стотици бродови стојат во место додека чекаат нивниот товар да биде обработен, пренесува „Reuters“.
„За жал, 2022-ра година не започна како што се надевавме. Пандемијата сè уште трае, и за жал, гледаме нови епидемии кои влијаат на нашата способност да го испорачаме товарот до клиентите“, се вели во соопштението на „Maersk“ објавено на веб-страницата на компанијата.
Контејнерските бродови најдолго чекаат за истовар или подигање на товар во близина на западниот брег на САД. На пристаништето Лонг Бич во Лос Анџелес, времето на чекање во моментов е помеѓу 38 и 45 дена, според „Maersk“.
Сепак, компанијата неодамна објави одредено олеснување во северна Европа, каде што пристаништето Антверпен, Белгија, се очекува да го намали чекањето на околу два дена во оваа недела, во споредба со речиси 10 дена во претходниот период.
Во меѓувреме, студија на Федералните резерви на САД покажа дека глобалниот притисок врз синџирите на снабдување е околу 4,5 стандардни отстапувања над нормалата. Вакви екстремни нивоа не се забележани од 1997-ма година.
И во декември, инфлацијата во Соединетите Држави достигна највисока годишна стапка на раст во речиси 40 години.
