Жичницата до врвот на Водно, која долго време не функционираше, од денеска сите граѓани повторно ќе можат да ја користат, изјави градоначалничката на Скопје, Данела Арсовска.
„Изминатиов период се завршени сите неопходни процедури за пуштање на жичницата во функција од технички и безбедносен аспект. Направен е редовен годишен преглед од овластена институција, мониторинг од Државен инспектор за жичници, како и редовен технички преглед“, објасни Арсовска.
Согласно со протоколот на Комисијата за заразни болести во кабина е дозволено да се превезуваат максимум 4 лица, односно искористеност на 50% од вкупниот капацитет на кабината, а патниците треба да носат заштитни маски.
Во текот на денот ќе се врши дезинфекција на внатрешноста на кабините.
Жичницата ќе работи секој ден, освен секој понеделник и последниот вторник во месецот.
Воедно во оптек се пуштени и трите автобуски линии до Средно Водно (25, 25А и 25Б). Автобуските линии за време на викенд и за државни празници се бесплатни за сите категории патници. Дозволен е превоз на домашно милениче куче со мал/среден раст и превоз на куче/придружник на лицата со хендикеп.
