Компанијата „Amazon“ спровела тестови на сопствена безжична мрежа. Нејзината функција е само за интернет пристап, објави агенцијата „Bloomberg“.
Целта на компанијата е да им даде поголема слобода на корисниците кои ги поседуваат нејзините хардверски уреди. Ова ќе му овозможи на „Amazon“ да претстави покомплетни и поразновидни услуги, со кои се надева дека ќе привлече уште повеќе клиенти.
Безжичната мрежа ги користела фреквенции на компанијата „Globalstar“, откриваат изворите на агенцијата. Компанијата е специјализирана за сателитските комуникации, но минатата година побарала одобрение од регулаторите да конвертира околу 80 проценти од фреквенциите за копнено емитување.
„Globalstar“ спровела свои независни тестови, кои покажаа дека интернет пристап преку нејзините фреквенции може да обезбеди поголеми брзини и да презема поголем сообраќај и оптоварување, отколку традиционалните јавни „WiFi“ мрежи. Се очекува регулаторите да донесат одлука во рамките на следните девет месеци.
Сепак останува нејасно дали „Amazon“ ќе е меѓу првите клиенти на „Globalstar“, ако добие решение за ваква дејност. Изворите на „Bloomberg“ не можат да откријат дали намерите на онлајн хипермаркетот се сериозни или се едноставно тестирање на различни технологии.
Раководните лица на „Amazon“ пак одбиваат да коментираат на оваа тема. Тоа е редовна пракса на претставниците на компанијата, кои обично коментира претежно само официјални работи.
