Европската унија подготвува глобален инфраструктурен план чија главна мисија е да се натпреварува со кинескиот проект „Еден појас, еден пат“. Инвестициите имаат за цел да го ослабат влијанието на Кина во Африка и другите региони, пишува „ВВС“, повикувајќи се на извори блиски до Европската комисија.
Планот на ЕУ, наречен „Глобален портал“, се очекува да се финансира и од буџетот на Заедницата и од банките, инвестициските фондови и приватниот сектор.
Според извори на „ВВС“, во самиот документ нема експлицитно да се наведе дека инвестициите во инфраструктурата ќе им конкурираат на кинеските. Но, економистите велат дека споредбите ќе бидат неизбежни.
„„Глобален портал“ воопшто не би постоел без „Еден појас, еден пат““, вели Ендрју Смол, аналитичар во „German Marshall Fund“. Според него, ова е прв случај во кој Европа се обидува да развие механизам кој нуди алтернатива на земјите кои земаат заеми од Кина.
Кинескиот проект „Еден појас, еден пат“ со години е во срцето на надворешната политика на Пекинг. Преку него, земјата планира да ги прошири своите трговски односи, а истовремено да инвестира во патишта, пристаништа и железници во различни делови на светот.
До денес, Кина воспостави контакти и планира иницијативи во Азија, Пацификот, Африка, па дури и во границите на ЕУ преку Западен Балкан.
Сепак, стратегијата на Кина е на удар, главно поради обидот да се наметнат сурови услови за кредитирање на земјите. Некои експерти дури го нарекоа пристапот „дипломатија на должничката стапица“.
Според Ендрју Смол, најголемиот предизвик за ЕУ ќе биде обезбедувањето средства за „Глобалниот портал“. Другата опасност е тој да потоне во „мочуриштето“ на бирократијата и внатрешните судири меѓу поединечните земји-членки на Унијата.
