Новиот претседател на Сојузот на стопански комори, Трајан Ангелоски во ексклузивно интервју за Денар вели дека неговите активности ќе бидат насочени кон заштита и унапредување на организаторската структура на комората. Трајан Ангелоски на позицијата претседател на ССК доаѓа како прв човек на Индустриската комора при ова бизнис здружение. Ангелоски е косопственик и извршен директор на компанијата за производство, трговија и развој на врзувачки елементи „Ариљеметал“, со која раководи повеќе од 10 години. Инаку тој по професија е машински инженер и магистер по технички науки.
Кој е Трајан Ангелоски?
Трајан Ангелоски е роден 1977 во Скопје по образование е дипломиран машински инженер и магистар по технички науки кој своето формално образование го стекна во Скопје на Машинскиот Факултет при Универзитетот СВ. Кирил и Методиј. Во повеке прилики и за време на студирањето и потоа со цел стекнување адекватна обука и вештини престојуваше во Германија, Австрија, САД, Јапонија, Кина, Тајван и други светски индустриски центри. Повеќе години Трајан Ангелоски е активен член на Управниот Одбор на ССК и Претседател на Индустриската Комора и претставува добар познавач на работите во македонската и европската индустрија.
Денар: Кои се првите чекори и проекти кои ќе ги има ССК со Вас како прв човек на комората?
Ангелоски: Одредени реформи во самата организација со цел зголемување на ефикасноста на работењето, дигитализација и користење на најновите софтверски алатки, продолжување со уште поголема брзина во правец на меѓународната соработка , тука наследивме одлична состојба од страна на претходната претседателка меѓутоа никогаш не е доволно и може повеќе и не смеме да застанеме.
Денар: Кои се слабостите на македонската економија, и што предлагате Вие за подобрување на состојбите?
Ангелоски:Оххх има многу проблеми, од немање на капитални инвестиции, па се до дестимулираноста на претприемачите да се занимаваат со бизнис.
Денар: Дали приватниот сектор ја надмина кризата предизвикана од пандемијата, или ќе биде потребно уште долго време за постепено опоравување?
Ангелоски: Кризата не е завршена. Ние уште не сме го достигнале економското ниво од 2019 год. Поради пандемијата ние ќе бидеме во временска дупка од 3 години.
Денар: Кој е вашиот став околу вакцинацијата, властите најавуваат задолжителна вакцинација за јавниот сектор но и бараат тоа да се практикува и во реалниот сектор?
Ангелоски: Мене оваа ситуација ми изгледа како префрлање на проблемот од министерството кон компаниите. Постои некоја бројка во јавноста дека од медицинскиот персонал се вакцинирани 70% , а 30% не се. Доколку ова е точно тогаш ние имаме реален проблем кој Министерството за здраство, прво треба да си ги реши проблемите во својот двор. Оние кои се образовале и цел живот работат во медицината, а не прифаќаат да се вакцинираат како обичните луѓе и да веруваат во вакцините и во целава ситуација. Треба да им се објасни на луѓето подетално што се предностите на вакцините, треба да се работи повеќе со луѓето.
Денар: Има ли финансиска кондиција стопанството за минимална плата од 18 илјади денари во 2022 година ?
Ангелоски: Ние не сме за вештачки-хибридни решенија, да го оставиме пазарот на трудот сам да ја одредува реалната плата. Се што е наметнато ќе предизвика контраиндикации во некои други области, намалување на бројот на работници можеби.
Денар: Кој е вашиот став за недела неработен ден ?
Ангелоски: Не разбираме навистина што е идејата со оваа мерка, ние сметаме дека сегашните мерки се сосема доволни и дека само се комплицира состојбата.
Денар: Дали сметате дека домашните компании имаат ист третман од државата како и странските инвеститори?
Ангелоски: Секогаш странските инвеститори биле привилегирани, а привилегиите ги обезбедуваат домашните компании.
Денар: Колку е тешко една компанија да се наметне на странски пазар со своите производи?
Ангелоски: Многу, истражување на пазар, развој на производ, маркетинг, дистрибуција, продажба, долг и скап процес. Се разбира нема алтернатива, мора да извезуваме повеќе во повеќе земји.
Денар: Кои закони според вас треба да се променат и што во нив конкретно, за подобра и поефикасна бизнис клима ?
Ангелоски: Многу треба да се работи за да се промени климата, имаме една од најслабите економии во Eвропа, мора многу да работиме.
Денар: Колку енергетската криза удри врз бизнисот?
Ангелоски: Почнува да удира се повеќе, меѓутоа следниот период ќе биде критичен се до пролет. Ќе видиме како ќе се одвива.
Денар: Како бизнисмен гледате на можно замрзнување на цените на дел од производите, како мерка против инфлацијата?
Ангелоски: Не, ако ова го направиме може да се случи да почне да снемува некои производи.
Денар: Колку воведувањето нова технологија и иновации во компаниите се гаранција за нивни раст и развој?
Ангелоски: Новитети мора да има, или ова ќе го правиме или ќе треба да ги затвориме компаниите.
Денар: Кое е решението на најголемиот проблем на фирмите, како до квалификуван кадар?
Ангелоски: Образованието мора да проработи на вистински начин, реформи во образованието особено во средното стручно школо.
