Големите потрошувачи на јаглен во кинеската индустрија, вклучително и производителите на електрична енергија, челик, цемент и хемикалии, би можеле да го достигнат врвот на потрошувачката на тоа фосилно гориво околу 2024-та година, изјави владин експерт.
Пекинг вети дека ќе ги намали емисиите на јаглерод до 2030-та година и ќе започне постепено да ја укинува употребата на јаглен од 2026-та година, потсетува „Reuters“.
Четири индустриски сектори сочинуваат повеќе од 86 отсто од вкупната потрошувачка на јаглен и сочинуваат повеќе од 70 отсто од вкупните емисии на јаглерод во Кина, која е на самиот врв во светот во однос на употребата на јаглен и емисиите на стакленички гасови.
„Овие сектори треба да потрошат 2,48 милијарди тони стандарден еквивалент на јаглен во најинтензивната фаза“, рече Као Донг, главен експерт на Кинеската академија за планирање на животната средина, истражувачки институт поврзан со Министерството за животна средина.
„Употребата на јаглен во секторите челик и цемент требаше да го достигне врвот (2020-та и 2021-ва година), а следната на ред е хемиската индустрија која користи јаглен како суровина, а врвот на потрошувачката треба да биде забележан околу 2024-та година“, кажа Донг.
„Секторот за производство на електрична енергија не треба да го достигне врвот на потрошувачката на јаглен до околу 2028-ма година, во услови на зголемена побарувачка за електрична енергија и зголемена загриженост за енергетската безбедност“, рече Донг.
Тој додава дека емисиите на јаглерод ќе бидат на највисоко ниво една година по периодот на најинтензивна потрошувачка.
Повеќе од 60 отсто од вкупната електрична енергија во Кина доаѓа од електрани на јаглен, а недостигот на таа енергија оваа година беше причина за чести прекини на електричната енергија, потсетува „Reuters“.
Донг, исто така, процени дека ќе бидат потребни вкупно 24,1 трилиони јуани (3,770 милијарди долари) инвестиции за да се ограничи потрошувачката на јаглен во тие четири сектори до 2035-та година.
Транзицијата може истовремено да генерира годишен бруто домашен производ од 159,5 милијарди јуани во сектори како што се обновливи извори на енергија и производство на опрема.
Се проценува дека намалувањето на употребата на јаглен во клучните индустрии ќе го намали извозот во просек за околу 1,030 милијарди јуани годишно до 2035-та година и дополнително ќе ја ограничи побарувачката за суровини како железна руда и варовник.
Увозот на железна руда веќе е намален за четири отсто во првите 10 месеци од оваа година, бидејќи Пекинг го ограничи производството на челик поради притисокот за намалување на емисиите.
