Американскиот претседател, Џо Бајден, денеска, во Белата куќа ќе ја пречека претседателката на Европската комисија, Урсула фон дер Лаен, за да разговара, меѓу другото, за трговијата и, како што наведува агенцијата „Ројтерс“, превирањата на Западен Балкан.
Средбата во Вашингтон доаѓа веднаш по средбата на Бајден и Фон дер Лаен на самитот Г20 во Рим и на климатската конференција на Обединетите нации во Глазгов, потсетува британската агенција.
Белата куќа соопшти дека лидерите ќе разговараат за серија насоки за економијата преку заедничкиот Совет за трговија и технологија на САД и ЕУ, како и за глобалното затоплување и регионалните прашања, како што се Украина и Западен Балкан.
„Ројтерс“ наведува дека Бајден прави обиди да ги зајакне врските со Европа откога неговиот претходник Доналд Трамп ги отфрли европските сојузници и институции за време на својот мандат.
„Претседателот Бајден ќе ја потврди својата поддршка за Европската Унија како фундаментален партнер на Соединетите Американски Држави“, нагласува портпаролката на Белата куќа, Емили Хорн, во соопштението.
