Федералните резерви на Соединетите држави објавија дека наскоро ќе почнат да го намалуваат темпото на месечни купувања на средства – првиот чекор за повлекување на огромната помош што ја дава на пазарите и економијата, пишува „CNBC“.
Намалувањето на купувањето средства „ќе започне подоцна овој месец“, соопшти Федералната комисија за отворен пазар по состанокот. Процесот ќе намалува 15 милијарди долари секој месец од сегашните 120 милијарди долари месечно со кои ФЕД купува хартии од вредност.
Комисијата рече дека потегот е направен „во светло на значителниот напредок што го постигна економијата во однос на целите на комисијата од минатиот декември до денес“.
Во соопштението, одобрено едногласно, се нагласува дека Банката на федерални резерви не дејствува со однапред одредена стапка, туку ќе направи корекции доколку е потребно.
„Комисијата смета дека ваквото намалување на стапката на нето-откуп на средства веројатно ќе биде соодветно секој месец, но е подготвена да ја прилагоди стапката на купување доколку тоа е оправдано со промените во економските изгледи“, соопшти Комисијата.
Одлуката ги исполнува очекувањата на пазарот по серијата сигнали од ФЕД дека ќе почне да ја намалува програмата, што ја забрза во март 2020-та година како одговор на пандемијата со Ковид-19.
Пазарите реагираа позитивно – хартиите од вредност пораснаа, а приносите на државните хартии од вредност исто така пораснаа.
Покрај намалувањето, ФЕД најави и мали промени во ставовите за инфлацијата, признавајќи дека зголемувањето на цените е побрзо и потрајно отколку што предвидуваа централните банкари, но сепак не се откажа од употребата на контроверзниот збор „преодна“.
„Инфлацијата се забрзува, што во голема мера ги одразува факторите кои се очекува да бидат минливи“, се додава во соопштението. „Нерамнотежата во понудата и побарувачката поврзана со пандемијата и отворањето на економијата придонесе за значително зголемување на цените во некои сектори.
Многу учесници на пазарот очекуваа ФЕД да се откаже од идејата за „преодни“ фактори со оглед на постојаното забрзување на инфлацијата.
Претседателот на Федералните резерви Џером Пауел рече дека очекува инфлацијата да продолжи да се забрзува бидејќи проблемите со снабдувањето продолжуваат и забавувањето почнува до средината на 2022-ра година.
Во соопштението, исто така, се вели дека се очекува економијата да продолжи да се подобрува, особено откако ќе се решат проблемите со снабдувањето.
