Осум месеци по официјалната премиера, „Cupra“ почна да прима нарачки за „Formentor VZ5“. Спортскиот кросовер, кој користи ист мотор како и „Audi RS 3“, сега е достапен на различни пазари, со цени кои започнуваат од 61.650 евра.
Автомобилот ќе доаѓа во лимитирана серија од 7.000 примероци, а покрај најскапиот, тој е и најмоќниот модел на брендот „Cupra“, кој повеќе не е дел од „Seat“, туку посебен производител на автомобили.
Под хаубата на кросоверот се наоѓа 5-цилиндричен бензински турбо мотор, кој е комбиниран со 7-степен автоматски менувач „DSG“ со двојна спојка и систем за погон на четири тркала „4Drive“.
Моторот може да се пофали со 390 ks и 480 Nm, кој има 10 ks помалку од „RS Q3“ и „RS Q3 Sportback“. Иако малку заостанува по моќ од неговите германски „братучеди“, кросоверот е всушност 0,3 секунди побрз при забрзување од 0 до 100 km/h – 4,2 секунди. Максималната брзина е електронски ограничена на 250 km/h.
Во споредба со „Formentor VZ“, кој има 310 ks, „VZ5“ има намалено растојание од 10 mm пониско од подлогата, како и поголеми клешти на сопирачките и 20-инчни тркала. Врвната верзија има и мат решетка на ладилникот, голем долен довод на воздух во предниот браник, нов дифузер од карбонски влакна назад, дијагонално распоредени пригушувачи и логото „VZ5“. Клиентите можат да изберат помеѓу мат бојата „Magnetic Grey“, како и „Petrol Blue“ и „Midnight Black“ металик.
Внатрешноста на спортскиот кросовер има предни седишта во црна или сина кожа, детали од темен алуминиум и бакар, 12-инчен екран на допир за инфозабавен систем со „Apple CarPlay“ и „Android Auto“, персонализирана дигитална табла со инструменти и неколку други елементи.