На новата листа милијардери убедливо доминира основачот на компаниите „Тесла“ и „Спејс Eкс“, кој од април заработил дури 60 милијарди долари.
Илон Маск (50), основачот на компаниите „Тесла“ и „Спејс Екс“, е убедливо најбогатиот човек во светот, судејќи според најновото рангирање на милијардерите.
Според Дејли Меил, Маск тежи дури 230 милијарди долари и од април годинава заработил дури 60 милијарди долари.
Него сигурно пандемијата на коронавирус не му наштети, бидејќи електричните автомобили се продаваат одлично, и тој добро се снајде во трката за вселенски туризам.
За брзината на неговото обогатување сведочи и податокот дека Маск само во средината на минатата година влезе во првите десет најбогати милијардери на планетата, а денес е убедливо прв.
Компанијата на Маск „Спејс Екс“ ја зголеми својата вредност. Вредноста на компанијата се проценува на 100,3 милијарди долари, а во моментов е втората највредна приватна компанија во светот по кинеската „Бајтденс“.
Маск, кој е роден во Јужноафриканската Република, ја започна својата кариера како ко-основач на “PayPal”, пред да основа двете компании по кои е познат денес. Тој неодамна објави дека ќе го премести седиштето на „Тесла“ од Калифорнија во Тексас со цел да ги намали трошоците за даноци.