Во Соединетите држави, 400 најбогати семејства плаќале даноци по пониска стапка од просечниот даночен обврзник.
Во извештајот на Белата куќа се посочува дека од 2010 до 2018 година, овие семејства плаќале даноци по стапка од 8,2 проценти. Тие сочинуваат 0.0002 проценти од вкупниот број даночни обврзници во оваа земја.
Во тој период тие платиле 1,8 трилиони долари данок, што е помалку од она што го платиле другите Американци. Во 2018 година, просечниот граѓанин плаќал данок по стапка од 13,3 проценти на нивниот приход.
Извештајот доаѓа откако демократите побараа богатите и корпорациите да се оданочуваат повеќе, и да обезбедат 3,5 трилиони долари финансирање потребни за подобрување на јавните услуги и инфраструктура – образование, здравствена заштита, платено отсуство и борба против климатските промени.
Републиканците се противат на овој предлог. Конгресменот од Тексас, Кевин Брејди, смета дека „оние што заработиле тешки пари“ ќе бидат оданочени и е незадоволен од можноста ова да биде „најголемото проширување на благосостојбата на државата досега“.
Претходно, истражувањето на невладината организација „ПроПублика“ покажа дека некои од најбогатите Американци, меѓу кои Џеф Безос, Мајкл Блумберг, Ворен Бафет, Карл Икан, Илон Маск и Џорџ Сорос, плаќале многу мал данок на богатството.
Беше посочено дека ова е последица на постојните даночни правила. Повеќето Американци се работници со ниски или просечни плати и плаќаат даноци за она што го заработуваат. Од друга страна, најбогатите Американци ги остваруваат своите приходи од инвестиции кои се помалку оданочени од нивните плати доколку се остваруваат континуирано повеќе од една година.
Богатите можат да избегнат плаќање данок на имот ако не ги продадат. Властите сега ги истражуваат оние што имале зголемување на вредноста на имотот без даноци.
Меѓутоа, даночната стапка од 8,2 проценти можеби не е точна поради можни методолошки грешки. Ова значи дека стапката може да биде помала – шест проценти, но исто така и повисока – 12 проценти. Не беа земени предвид сите други видови на оданочување, пишува CNBC.
