Германија планира да издаде должнички хартии од вредност во рекорден износ од 482 милијарди евра во оваа година откако го користеше тој инструмент, и покрај намалениот износ на долг што ќе биде издаден во четвртиот квартал од годината.
Федералната агенција за финансии објави дека од октомври до декември, Германија ќе издаде 104 милијарди евра должнички хартии од вредност кога ќе се вклучи долгот индексиран за инфлација.
Тоа е четири милијарди евра помалку од првичниот план, а причините за тоа лежат во фактот што помалку компании побараа финансиска поддршка во кризата предизвикана од последиците од Ковид-19, што ја нуди фондот за стабилизација на економијата, отколку што очекуваа тамошните власти.
Федералната агенција за финансии објави дека ќе позајми 47 милијарди евра на пазарите на капитал, и уште 57 милијарди евра на пазарите на пари. На крајот, и покрај донекаде намалените потреби, најсилната европска економија ќе позајми рекордни 482 милијарди евра.
Втора година по ред, германскиот министер за финансии Олаф Шолц повторно формално побара од парламентот да ја суспендира уставната обврска за ограничување на задолжувањето со цел да се овозможи нето нови (до) 240 милијарди евра долг во оваа година за да се ублажат последиците од кризата со коронавирусот и поддршка на локалната економија. Според „Reuters“, владата мора да ги рефинансира и долговите што доспеваат.
Само во летниот квартал, Германија врати или презакажа стар долг од над 100 милијарди евра.
Со зголемената инфлација и зголемените каматни стапки, неизвесноста се враќа на пазарите и фокусот повторно е ставен на инвестирање во обврзници. Пазарите на обврзници се во втор план со години поради милијардите евра (и долари) ликвидност што централните банки ги пумпаа во системот, поттикнувајќи ги берзите.
