Францускиот производител на лекови „Sanofi“ во средата соопшти дека ќе ја купи американската биофармацевтска компанија „Kadmon Holdings“ за 1,9 милијарди долари, објави „Reuters“.
Ова се случува еден месец откако „Sanofi“ го објави купувањето на друга американска компанија за биотехнологија, „Translate Bio“, за 3,2 милијарди долари.
Од „Sanofi“ соопштија дека понудиле 9,50 долари во готово за акција на „Kadmon“, во вредност од речиси 1,9 милијарди долари, и дека одборите на двете компании едногласно го одобриле договорот. Понудата на „Sanofi“ претставува премија од 79% за затворање на цената на „Kadmon“ од 5,30 долари во вторникот.
„Купувањето ја поддржува стратегијата на „Sanofi“ за продолжување на зголемувањето на основните лекови и ќе го додаде „Rezurock“ (белумосудил) во портфолиото за третман на трансплантација“, се вели во заедничката изјава на двете компании.
„Rezurock“, лек за возрасни и деца над 12 години со болест на трансплантација наспроти домаќин (Graft-versus-host disease – GVHD), беше одобрен во јули од Администрацијата за храна и лекови на Соединетите држави (ФДА).
„Проектите на „Kadmon“ вклучуваат потенцијални лекови за имунолошки и фиброзни заболувања, како и имуно-онколошки терапии“, велат компаниите.
„Sanofi“ е под притисок да го засили својот развој на лекови и исто така работи на надминување на неуспесите во трката за вакцина против Ковид-19.
