Една последица од пандемијата на коронавирусот се случува во едно малку веројатно место, а тоа е вселенската индустрија.
Зголемувањето на бројот на пациенти со Ковид-19 го пренасочува течниот кислород во ракетите во болниците, поради што НАСА во петокот објави дека ќе го одложи лансирањето на следниот сателит за набљудување на Земјата за една недела, објави „Bloomberg“.
Кислородот, изладен до течна форма на -184 ° C е клучен дел од ракетното гориво на компаниите од „SpaceX“ до „ULA“ до „Virgin Orbit“. Сега индустријата очекува одложување на лансирањето бидејќи пациентите имаат предност во синџирот на снабдување.
„Луѓето се на прво место“, рече Ричард Крег, потпретседател за технички и регулаторни работи на Асоцијацијата за компримиран гас во САД.
Снабдувањето со кислород се зголеми низ целата земја поради употреба на медицински кислород, но потребата е најостра во Флорида, каде што порастот на инфекции со Ковид-19 ги наполни болниците.
Некои градови во Флорида, вклучувајќи ги Орландо и Тампа, воведоа ограничувања за употреба на вода, бидејќи некои пречистителни станици користат кислород во процесот на дезинфекција.
Недостатокот на работна сила кај комерцијалните возачи на камиони, кои мора да имаат специјализирана обука за транспорт на одредени гасови, како што е кислородот, исто така, ги комплицираше потешкотиите во снабдувањето, рече Крег. Во прилог на ракетирањето, течниот кислород (најчесто наречен „LOX“) се користи во заварување и во производство на челик, хартија, стакло, хемикалии и фармацевтски производи.
Претседателот на „Space Exploration Technologies Corp.“, Гвен Шотвел ги повика сите што имаат кислород да ја контактираат, поради тоа што ситуацијата е многу алармантна. „SpaceX“ користи метан и течен кислород за да ги напојува моторите „Merlin“ на своите ракети „Falcon 9“. Многу поголемата ракета на компанијата, „Starship“, исто така користи „LOX“ како гориво.
„Сигурно ќе се погрижиме болниците да имаат кислород што им е потребен, но секој што има течен кислород нека ми испрати е-пошта“, повика Шотвел на 24-ти август за време на панел дискусијата на 36-от вселенски симпозиум.
Илон Маск, основачот на компанијата, напиша на Твитер дека снабдувањето со чист течен кислород е „ризичен, но сѐ уште не ограничувачки фактор“ за лансирањата на „SpaceX“. Компанијата достави храна и други резерви на Меѓународната вселенска станица на 29-ти август и планира да лансира нова серија од своите сателити „Starlink“ во орбита веќе следниот месец.
