Многу инвеститори во злато можеби се исплашени од можноста Федералните резерви да ги намалат монетарните стимулации, но Германците акумулираат злато со особено брзо темпо, наведува „Bloomberg“.
Побарувачката за благородниот метал во Германија, традиционално најголемиот купувач на шипки и монети во Европа, е најголема барем од првата половина на 2009-та година, покажуваат податоците на Светскиот совет за злато, цитирани од „Bloomberg“. Иако интересот е голем во другите западни земји, Германците се особено активни во купувањето, со надеж дека ќе се заштитат од инфлација.
„Имаме долга историја на страв од инфлација во нашата ДНК. Сега ризиците од инфлација се забрзуваат“, вели Рафаел Шерер, управен директор на трговецот со метали „Philoro Edelmetalle GmbH“. Неговата продажба е зголемена за 25% во споредба со веќе силната 2020-та година.
„Прогнозата за благородните метали е многу позитивна“, додаде тој.
„Љубовта на Германците кон златото датира од хиперинфлацијата за време на Вајмарската Република пред еден век. Минатиот месец, отворањето на економијата по продолжените блокади повторно ги доведе цените на највисоко ниво во повеќе од една деценија. Негативните каматни стапки во Европа, исто така, ги прават неприносните средства многу привлечни“, рече Шерер.
Германската екстремно десничарска партија Алтернатива за Германија ја користи зголемената инфлација за да ја зголеми поддршката пред изборите на 26-ти септември. Таа ја обвини Европската централна банка дека ги лишила Германците од нивните заштеди со својата „осудувачка“ политика со нула камати.
Побарувачката за шипки и монети во првата половина од годината во Германија се зголеми за 35% во текот на претходните шест месеци во споредба со 20% за остатокот од светот, според Светскиот совет за злато.
И покрај тоа, цените на златото на пазарот паѓаат за речиси 7% од почетокот на јуни.
Трговците со злато, како и другите учесници на пазарот, внимателно ќе ја следат изјавата на Џером Пауел за можните сигнали дали стимулот наскоро ќе се намали. Од другата страна на океанот, очекувањата за зголемување на каматните стапки од Европската централна банка во наредните години остануваат слаби. Ова би можело да ја поддржи побарувачката за злато во Германија, иако светските цени паѓаат.
„Златото „отсекогаш играло улога меѓу германските инвеститори“. Со зголемениот интерес за купување во последниве години, тој стана поизразен“, вели Александар Цумфе, висок трговец во „ Heraeus Metals Germany GmbH & Co. KG“.
