Германскиот медиумски гигант „Axel Spinger“ објави дека ќе го купи „Politico“, засилувајќи ја кампањата за изградба на американска новинска империја, пишува Bloomberg.
„Axel Spinger“ ќе плати повеќе од 1 милијарда долари за договорот, според извор запознаен со оваа работа, кој сакаше да остане анонимен. Покрај тоа, компанијата ги купува 50-те проценти што не ги поседува од „Politico Europe“, како и технолошката веб-страница „Protocol“, се вели во нејзиното соопштение. Се очекува договорот да биде финализиран во четвртиот квартал.
Компаниите не ги откриваат условите од договорот.
Стекнувањето на „Politico“ е дел од серијата договори за американските медиумски компании во изминатите неколку години. Во 2014-та година, „Axel Spinger“ формираше заедничко вложување со „Politico“ за да ја лансира европската верзија на веб-страницата. Во 2015-та година го купи „Business Insider“, а минатата година „Axel Springer“ се здоби со мнозински удел во „Morning Brew“, кој нуди билтени.
Политико е основан во 2007-ма година и, како што сугерира неговото име, ја отсликува политичката ситуација. Иако повеќето написи се бесплатни, компанијата објавува вести и анализи под брендот „Politico Рro“ за претплатници.
Индустријата за дигитални медиуми се консолидира бидејќи огласувачите насочуваат сѐ повеќе од нивните буџети кон технолошките гиганти како „Facebook“ и „Google“. Минатата година, „BuzzFeed“ го купи „HuffPost“ од „Verizon Communication“. Во 2019-та година, „Vice Media“ ја купи „Refinery29“, а „VoxMedia“ потпиша договор за „New York Media“, матичната компанија на „New York Magazine“.
„Axel Spinger“ е издавач на германскиот весник „Bild“. Во 2020-та година, компанијата стана приватна преку договор предводен од американската акционерска фирма „KKR & Co“.