Заздравувањето на германската економија е загрозено од постојаното намалување на глобалната понуда и зголемениот број на луѓе заразени со Ковид-19, пренесува „Bloomberg“.
Клучен показател за деловната доверба во најголемата европска економија во минхенскиот институт „Ифо“ падна на 99,4 поени во август од 100,7 поени во јули. Падот е поголем отколку што предвидуваа економистите.
„Јасно е дека изгледите за раст ќе треба да се ревидираат надолу“, рече претседателот на „Ифо“, Клеменс Фуест. Тој додаде дека недостатокот на меѓупроизводи не е ограничен само на полупроводници, што ја погоди доминантната автомобилска индустрија во земјата.
„Има недостаток од метални производи, пластични производи, дури и хартија. Секако, мора да се земат предвид и ефектите од пандемијата“, вели Фуест.
Загриженоста за изгледите настана додека Германија се подготвува за изборите следниот месец. Победникот ќе ја наследи актуелната канцеларка Ангела Меркел, која остана на власт 16 години.
Централната банка на Германија, Бундесбанк, оваа недела рече дека економскиот раст оваа година може да биде нешто под очекуваните 3,7% во јуни. Но, според Фуест, многу зависи од тоа колку долго ќе трае недостатокот на понудата.
„Овој месец забележуваме дека во индустриското производство работите всушност се влошуваат наместо да се подобруваат. Доколку овој тренд продолжи, тоа ќе биде причина за значително намалување на изгледите за раст“, рече Фуест.
Нарушувањата во снабдувањето и зголемениот број инфекции со коронавирусот се покажуваат како клучни предизвици со кои се соочува глобалната економија, за која првично се мислеше дека го остави зад себе најлошото од пандемијата.
Податоците објавени во средата покажаа дека швајцарската економија зависна од извоз, исто така, е сѐ повеќе оптоварена со проблеми во синџирот на снабдување. Индексот на „Credit Suisse“ падна за речиси 51 поен во август на -7,8 поени.
Истражувањето спроведено на околу 3.000 германски компании минатата недела покажа дека повеќето очекуваат проблеми со синџирот на снабдување да се подобрат следната година. Според анкетата, компаниите исто така почнаа да ги пренесуваат зголемените средни трошоци на клиентите.
Потрошувачките трошоци надоместија дел од слабоста во индустриското производство во вториот квартал во Германија, а секторот услуги се опоравува од ублажувањето на ограничувањата поради пандемијата. Но, растот на заразените како резултат на делта сојот предизвикува загриженост и за овие сектори, забележува „Ифо“.
„Забележуваме дека во најранливите сектори од овој развој – туризмот, хотелите и рестораните, очекувањата за следните шест месеци се намалуваат“, рече Фуест. „Ако се вакцинираат повеќе луѓе, можеме да живееме со поголем број заразени лица, но ако вакцинациите продолжат да се одложуваат, навистина имаме проблем“, рече Фуест.
