Европската централна банка ќе ја задржи својата стимулативна монетарна политика сè додека не се постигне целта на инфлацијата од 2% поставена во нејзината долгорочна стратегија. Ова се наведува во официјалното соопштение на институцијата по денешниот состанок на Управниот одбор.
Основните каматни стапка на рефинансирање, кредитно и депозитно работење останаа непроменети на 0%, 0,25% и -0,5%, соодветно.
ЕЦБ посочува дека прогнозата за среднорочна инфлација е сè уште далеку под целното ниво, што бара ревизија на очекувањата за движење на каматните стапки.
Институцијата очекува дека каматните стапки ќе останат на сегашното или пониско ниво се додека инфлацијата не достигне 2% и не се стабилизира на тоа ниво. Централните банкари од Франкфурт исто така дозволуваат преоден период во кој инфлацијата може накратко да надмине 2%.
Управниот одбор исто така посочи дека купувањето обврзници во рамките на програмата за итни случаи воведена за време на пандемијата Ковид-19, ќе продолжи овој квартал со побрзо темпо отколку во првите месеци од годинава. Тие ќе останат активни најмалку до март 2022-ра година.
Нето-набавките во рамките на Програмата за директно купување средства, ќе достигнат 20 милијарди евра месечно и ќе се одржуваат сè додека има потреба од дополнителна поддршка за други парични стимуланси. Директните набавки на финансиски средства ќе бидат прекинати пред да започне какво било покачување на каматната стапка.
Сепак, приходите од веќе купените должнички хартии од вредност, во форма на камати и главница, ќе продолжат да се инвестираат од централната банка сè додека има потреба за поддршка на ликвидноста на пазарот, соопшти институцијата.
Еврото поевтинува малку во однос на доларот по објавувањето на одлуките на денешниот состанок на ЕЦБ. Единствената валута изгуби 0,2% од својата вредност и во моментов се тргува со 1,1772 долари за евро.
