Нема потреба за модификација на вакцината „спутник В“ против новите видови

Вакцината „спутник В“ не треба да се модифицира во моментот, бидејќи сè уште е многу ефикасна во борбата против ширењето на Ковид-19, изјави денеска Владимир Гушчин од Националниот истражувачки центар за епидемиологија и микробиологија „Гамалеја“.

„Можеме да создадеме адаптирани варијанти на вакцината против нови видови на коронавирус ако има веродостојни информации и податоци за тоа, но засега не гледаме потреба за такво нешто“, изјави Гушчин за руската телевизија, а пренесува агенцијата ТАСС.

Рускиот истражувач посочи дека тековната вакцина „спутник В“ ги нуди сите потребни нивоа на заштита: ефикасно штити од смртни случаи поврзани со вирусот и тешки симптоми на болеста, клинички симптоми на болеста и го намалува вирусното оптоварување во телото на заразените луѓе.