Јапонската економија во вториот квартал напредувала за 2,6 проценти, побавно од тоа што беше очекувано. Компаниите во оваа земја претпазливо очекуваа пооптимистични економски резултати со цел да ги зголемат инвестициите.
Во однос на претходниот квартал, третата најголема светска економија во трите месеци заклучно со јуни се зголеми за 0,6 проценти, покажуваат прелиминарните податоци на јапонската влада, пренесува агенцијата АП.
Јавниот долг на официјален Токио надмина 10,4 билиони долари минатата недела и потребено е силно економско закрепнување со цел даночните приходи да се зголемат доволно за да може „планината“ од јавни долгови да почне да се намалува.
Аналитичарите во вториот квартал очекуваа раст од најмалку три проценти на годишно ниво, по 3,8 процентниот раст од првиот квартал.
Резултатите послаби од очекуваните најверојатно ќе го зголемат притисокот на владата, а премиерот Шинзо Абе ќе ги забрза реформите кои ги вети со цел да се подобри конкурентноста на Јапонија и да се обезбеди одржлив економски раст на подолг рок.