Сопствениците на гигантскиот брод со контејнери што го блокираше Суецкиот канал во март, дадоа нова понуда во спорот за компензација со управителите на каналот. Адвокатoт на властите го откри ова, откако одлуката на судот за случајот беше одложена за две недели, пренесува „Reuters“.
Контејнерскиот брод „Ever Given“ остана закотвен во езеро меѓу два дела на каналот откако беше пуштен на 29 март. Остана заробен шест дена, блокирајќи го минувањето на стотици бродови, нарушувајќи ја светската трговија.
„Suez Canal Authority“ (SCA) побара 916 милиони американски долари обештетување за да ги покрие напорите за испразнување на каналот, оштетување на угледот и изгубени приходи пред да објави јавно дека ја намалува сумата на 550 милиони долари.
Јапонскиот сопственик на „Ever Given“, „Shoei Kisen“ и неговите осигурителни компании ја оспоруваат тужбата и конфискацијата на бродот според одлуката на египетскиот суд.
Преговорите продолжуваат до сабота, коментираше адвокатот на „SCA“, Халед Абу Бакр, за време на судското рочиште во Исмаилија за конфискацијата на бродот. Сопствениците на бродот дадоа нова понуда, рече тој, без да наведе детали.
Претседателот на „SCA“ претходно изјави дека „Shoei Kisen“ понудила да плати 150 милиони долари.
Судската пресуда треба да се одржи во недела, по неколку одложувања, но правниот тим на „Shoei Kisen“ побара повеќе време за преговори.
Судски извори велат дека случајот е одложен за 4-ти јули за да се овозможи „пријателски договор“ меѓу страните.
