Италијанската финансиска полиција започна истрага за да утврди дали платформата за дигитално резервирање на сместувачки капацитети на „Booking.com“ затаила данок, соопштија официјалните лица.
Дигиталната компанија со седиште во Холандија е осомничена дека избегнала плаќање на повеќе од 150 милиони евра данок на додадена вредност (ДДВ) помеѓу 2013-та и 2018-та година.
„Booking.com“ потврди дека добила извештај од финансиската полиција и соопшти дека ќе соработува со истражителите.
Полицијата соопшти дека започнале да ги проверуваат резервациите за сместување околу Џенова уште во 2018-та година.
Се покажа дека „Booking.com“ издава фактури без ДДВ поради пренесување на даночна обврска, што доведе до тоа тие воопшто да не плаќаат даноци во Италија.
