Претседателот на САД, Џо Бајден, постави нова цел во кампањата за имунизација против коронавирусот, 70 проценти од возрасните во САД да добијат барем една доза на вакцина против Ковид-19 до 4 јули, Денот на независноста.
„За два месеци, од денес, семејствата низ целата земја ќе го прослават 4-ти јули. „Нашата цел е 70 проценти од возрасните американци да примат барем една доза на вакцината до тој датум, а најмалку 160 милиони да бидат целосно вакцинирани“, рече Бајден во јавното обраќање во Белата куќа.
За да се исполни таа цел, Бајден им наложи на десетици илјади аптеки, кои учествуваат во федералната програма, да овозможат вакцинација без закажување.
Ресурсите од Федералната агенција за управување со вонредни состојби (ФЕМА) ќе бидат пренасочени за поддршка на привремени и подвижни клиники и помали локални локации за вакцинирање, соопштија официјални претставници на администрацијата.
Повеќе од 56 проценти од возрасните граѓани во САД примиле барем една доза на вакцина, додека над 105 милиони биле целосно вакцинирани, според Центрите за контрола и превенција на болести.
