Иако помалку луѓе беа во можност да земат пиво во паб за време на пандемијава, сепак преовладува глобалната желба за пиво. На пример, продажбата на пивото Корона всушност се зголеми во изминатата година, и покрај – или можеби поради – пандемијат на коронавирусот.
Овој светски индекс на пиво од Expensivity ја споредува просечната цена на шише пиво во 58 земји во детална мапа. Дополнително, ние покажуваме кои земји трошат најмногу пиво по глава на жител и колку точно пиво пијат луѓето.
Просечна цена на пивото
Истражувачите ја пресметале просечната цена на типично шише пиво (330 ml) од познати брендови преку онлајн продавници и базата на податоци на Numbeo Покрај тоа, локалните цени на пивото беа добиени од менијата во хотелите и баровите, а просечните вредности беа претворени во долари.
Во Катар, ќе треба да издвоите 11,26 долари за едно пиво, што сигурно би направило навистина скапа ноќ за излегување во градот. Делумно, тоа е затоа што во 2019 година, земјата со муслиманско мнозинство воведе акциза од 100% на претходната продажна цена на целиот увоз на алкохол.
Овие стрмоглави цени се насочени кон туристите – и со тоа што Катар е домаќин на Светското првенство во фудбал во 2022 година, во земјата ќе има илјадници посетители кои бараат “едно ладно” по секоја цена.
Со само 1,68 долари по шише, Јужна Африка има најниска просечна цена на пивото, благодарение барем делумно на културните норми за купување на големо. Според истражувањето, нашата земја има евтино пиво со просечна цена од 2,34 долари за шише.
Трошоци на пиво по глава на жител
Цената на едно пиво е една работа, но кои земји трошат најмногу на самото пиво? Германија не е изненадувачки дека е на врвот на листата со скоро 2.000 долари по глава на жител, поткрепено со нејзината силна пиво култура и годишната прослава на Октоберфест.
Германија, исто така, се гордее со чистотата на пивото – огромен број на пиварници го следат Reinheitsgebot, законите за чистота со векови стари, според кои, пивото може да содржи само три состојки: вода, јачмен и хмељ.
Следна на листата е Полска, која троши 1.738 долари по глава на жител. Во меѓувреме, САД е на осмото место во светот за најголемо трошење на пиво по глава на жител со 1.554 американски долари – пивото е исто така најпопуларниот алкохолен пијалок во земјата.
Колку пиво пијат луѓето?
Користејќи податоци од Светската здравствена организација, визуелизацијата подолу исто така истражува колку пиво се консумира низ светот по глава на жител.
Чешка се појавува на врвот во овој поглед, со 468 пива во просек за една година – што значи по 1,3 пива на ден. Следни се Шпанија и Германија со 417, односно 411 пива. Според индексот, во нашата земја македонецот пие во просек 133 пива годишно.
Од друга страна, луѓето на Хаити пијат само околу четири пива годишно. Ова може да биде затоа што тие претпочитаат нешто малку посилно – 97% од потрошувачката на алкохол во нацијата доаѓа од рум.
Пивото постои повеќе од 7.000 години. Без оглед на цената на пивото во вашата земја, вреди да се подигне чаша и да се наздрави.
