2020-та година беше година како никоја досега, и во овој случај не е поради пандемијата. Во последните 12 месеци сме сведоци на голем број иницијални јавни понуди, пораст на цените на акциите, како и раст на крипто-валутите. Ова доведе до невиден раст на милијардерите ширум светот, според 35-тото издание на годишното рангирање на списанието „Forbes“ за најбогатите луѓе во светот.
Денес тие се веќе 2.755 на број, или 660 повеќе од една година порано. Нивното комбинирано богатство порасна од 8 трилиони на 13,1 трилиони долари.
Вкупно 493 се апсолутни дебитанти во рангирањето, што значи дека на секои 17 часа во светот, некој ја надминал границата на своето богатство од 1 милијарда долари. Вкупно 210 од новите милијардери се од Кина и Хонг Конг, а 98 се од САД.
Најбогата дебитантка е Миријам Аделсон од Невада, која ја наследи казино-империјата на нејзиниот покоен сопруг Шелдон Аделсон, кој почина во јануари. Други познати личности кои дебитираа за „Forbes“ се ТВ-продуцентот Тајлер Пери, најмладата самостојна вработена жена Витни Волф Херд, основачот на апликацијата за состаноци „ Bumble“, како и основачот на интернет-компанијата „Checkout.com“, Гиом Пуса.
Уште 250 лица кои беа присутни во рангирањето во претходните години, но не беа присутни во 2019-та година, се враќаат. Според магазинот „Forbes“, 86% од денешните милијардери се побогати отколку пред една година.
Значи – да видиме кои се најбогатите луѓе на планетата:
Џеф Безос е во првите редови четврта година по ред, а неговото богатство порасна на 177 милијарди долари или 64 милијарди долари повеќе од пред една година.
Елон Маск се искачи на второто место откако неговото богатство се зголеми за 126,4 милијарди долари во минатата година на 151 милијарда долари, што го прави најголем победник за 2020-та година.
Причината за ова е порастот на акциите на „Tesla“ за 705%.
Французинот Бернард Арно, кој е сопственик на империјата за луксузни производи „LVMH“, во кој се „Louis Vuitton“ и „Christian Dior“, е на третото место со богатство од 150 милијарди долари. Само пред една година, тој поседуваше 76 милијарди долари, но акциите на компанијата додадоа 86% на својата вредност во последните 12 месеци.
Топ 10-те најбогати луѓе во светот веќе поседуваат 1,15 трилиони долари, наспроти 686 милијарди долари пред една година.
Вкупно четворица од милијардерите веќе имаат над 100 милијарди долари богатство, а во првите тројца се приклучи и основачот на „Microsoft“, Бил Гејтс, чие богатство се проценува на 124 милијарди долари.
Првата петорка е надополнета со Марк Цукерберг, кој поседува 97 милијарди долари или 42 милијарди долари повеќе од една година порано, поради порастот на цената на акциите на „Facebook“ за повеќе од 80%.
Инвеститорот Ворен Бафет се наоѓа на шестото место со 96 милијарди долари, што го прави надвор од првите пет за прв пат од 1993-та година. 90-годишниот милијардер успеа да додаде 28,5 милијарди долари во пандемиската година.
Најдобрите 10 милијардери во светот ги надополнуваат Лари Елисон („Oracle“, 93 милијарди долари), ко-основачите на „Google“, Лери Пејџ и Сергеј Брин, кои поседуваат 91,5 и 89 милијарди долари, и Индиецот Мукеш Амбани со 84,5 милијарди долари.
Најбогата жена на светот е Франсоа Бетанкур Маерс, која е наследничка на империјата „L’Oreal“. Таа е на 12-тото место со 73,6 милијарди долари.
Соединетите држави сè уште се во првите редови како земја со најголем број милијардери во светот. Денес тие се 724, надминувајќи ја Кина со своите 698 милијардери.
Сепак, Пекинг го надминува Њујорк како град со најмногу врвни богаташи.
Вкупно 1.975 милијардери самостојно го стекнале своето богатство, апсолутен рекорд, споредено со 1.457 година претходно, или 72% од сите.
Вкупно 106 од милијардерите се на возраст под 40 години, а 2/3 од нив се жени.
Најновиот млад милијардер кој сам си го стекнал богатството е Остин Расел, кој го напушта Стенфорд за да основа своја компанија „Luminar Technologies“. Денес, 26-годишниот Расел поседува 2,4 милијарди долари.
Сепак, имаме и нов рекорд за нов најмлад милијардер во рангирањето. Тоа е 18-годишниот Кевин Дејвид Леман од Германија, веќе има на располагање 3,3 милијарди долари откако неговиот татко му го префрли својот удел во ланецот „dm-drogerie“.
Најстариот е осигурителниот магнат Џорџ Џозеф, кој има 99 години.
Мукеш Амбани е еден од најбогатите луѓе во Азија откако го престигна Џек Ма од „Alibaba“.
Вкупно 61 лице, кои биле милијардери пред една година, денес не се присутни на рангирањето, а 23 од нив починаа.
Последниот фатален случај беше со чешкиот милијардер Петр Келнер. Тој почина во хеликоптерска несреќа на Алјаска, а неговото богатство од 17,5 милијарди долари ќе биде пренесено на сопругата и децата.
„Forbes“ користи податоци од 5-ти март за пресметување на богатството на милијардерите.
Погледнете ги 20-те најбогати луѓе во светот:
1. Џеф Безос (Amazon) – 177 милијарди долари
2. Илон Маск (Tesla) – 151 милијарда долари
3. Бернард Арно (LVMH) – 150 милијарди долари
4. Бил Гејтс (Microsoft) – 124 милијарди долари
5. Марк Цукерберг (Facebook) – 97 милијарди долари
6. Ворен Бафет (Berkshire Hathaway) – 96 милијарди долари
7. Лери Елисон (Oracle) – 93 милијарди долари
8. Лери Пејџ (Alphabet) – 91,5 милијарди долари
9. Сергеј Брин (Alphabet) – 89 милијарди долари
10. Мукеш Амбани (Reliance Insustries) – 84,5 милијарди долари
11. Амансио Ортега (Zara) – 77 милијарди долари
12. Франсоа Бетанкур Мејерс (L’Oreal) – 73,6 милијарди долари
13. Жонг Шаншан (Nongfu Waters) – 68,9 милијарди долари
14. Стив Балмер (Microsoft) – 68,7 милијарди долари
15. Пони Ма (Tencent) – 65,8 милијарди долари
16. Карлос Слим (America Movil) – 62,8 милијарди долари
17. Алис Волтон (WalMart) – 61,8 милијарди долари
18. Џим Волтон (WalMart) – 60,2 милијарди долари
19. Роб Волтон (WalMart) – 59,5 милијарди долари
20. Мајкл Блумберг (Bloomberg) – 59 милијарди долари.
