Грчкиот министер за туризам Харис Теохарис, кој патува низ земјите од каде редовно доаѓаат гости во Грција, го претстави планот на владата за отворање на туризмот.
Планот на Грција е да започне да прима странски гости на 14 мај годинава, што зависи каква ќе биде тогаш состојбата со пандемијата.
Тој додаде дека, со иста состојба – ако епидемиолошките податоци се поволни, желбата е да се отвори туризамот за патниците од некои земји со голем процент на вакцинирани веќе во средината на април.
Теохарис ги претстави и „петте линии на одбрана“ на Грција, односно условите за влез на патници и престој во Грција.
„Првата линија на одбраната“ е дека секој странски турист мора да има потврда дека бил вакциниран против коронавирусот, дека се опоравил од инфекцијата со вирусот или да покаже негативен резултат од корона тест.
„Втората линија на одбраната е дека самите ќе извршиме тестови од туристи по пристигнувањето. Оваа стратегија за контрола ќе биде фокусирана особено на оние кои доаѓаат од земји каде што ќе има поголема концентрација на позитивни случаи претходниот ден“, изјави министерот.
„Третата линија на одбрана“ на Грција е наменета за туристи во карантин веднаш во случај на позитивен тест, а потоа да подлежи на детален PCR тест.
„Четврта линија на одбрана“ се општи правила за безбедност, како што се задолжителна употреба на маска или држење далечина, ограничувања во ресторани, автобуси, туристички патувања и разгледувања.
„Петтата линија на одбрана“ е, подвлече министерот, дека сите треба да ги следат истите правила како Грците. „Ако има обврска грчките граѓани да носат маска, истото ќе важи за сите, без оглед дали биле вакцинирани или не“, нагласи тој.
Теохарис рече дека вакцинирањето на персоналот во грчкиот туристички сектор, исто така, ќе помогне во заштитата од инфекции.
