Стотици милиони луѓе ширум светот користат статини, лекови кои го намалуваат нивото на холестерол во крвта и го спречуваат ризикот од развој на срцеви заболувања, а новата американска студија покажа дека овие лекови ја намалуваат и смртноста од Ковид-19, пренесува порталот Medical News Today.
Покрај нивната главна цел, статините имаат и силно антиинфламаторно, антикоагулантно и антивирусно дејство, а сето тоа може да придонесе за намалување на компликациите поврзани со тешката клиничка слика од Ковид-19.
Затоа не е изненадувачки што група американски научници, меѓу кои имаше и кардиолози кои се грижеа за луѓе кои страдаа од коронавирусот, го истражуваа влијанието на статините врз таа болест.
Тие го споредиле резултатите од третманот на 1.296 пациенти кои биле хоспитализирани поради Ковид-19, од кои половина користеле статини редовно пред инфекцијата, а половина не.
Откако се сегментирале пациентите за да се исклучат демографските разлики и другите фактори на ризик, тие откриле дека употребата на статин кај испитаниците ја намалува смртноста за 50 проценти еден месец по хоспитализацијата.
Тоа е најголемата студија од ваков вид спроведена досега, но не е единствената. Студија спроведена минатата година во Сингапур покажа дека луѓето кои користат статини имаат помала веројатност да завршат на одделот за интензивна нега поради ковид, отколку оние кои не ги земаат како вообичаена терапија.
Американско истражување исто така открило дека пациентите кои користат статини се опоравуваат побрзо од Ковид-19.
Научниците сметаат дека тоа може да биде така затоа што статините, покрај тоа што го намалуваат воспалението и ризикот од згрутчување, го отстрануваат холестеролот од надворешната обвивка на клетката. Рецепторите на кои се врзува SARS-CoV-2, вирусот што предизвикува ковид, се наоѓаат во делот на клеточната мембрана каде се таложи холестеролот. Без него, вирусот не може да навлезе во клетката, покажаа резултатите од студијата.
Научниците сега треба да ги потврдат своите наоди со поголеми и подетални клинички истражувања. „Доколку клиничките испитувања ги потврдат резултатите, статините би можеле да се покажат како ефтина и ефикасна терапевтска стратегија во борбата против ковид пандемијата“, рече водечкиот автор на студијата, др. Махеш В. Мадхаван, кардиолог во медицинскиот центар Ирвинг на Универзитетот Колумбија во Њујорк.
