Светските цени на храната продолжуваат да растат, деветти месец по ред. Ова е нивно највисоко ниво од јули 2014-та година, а зголемувањето го предводат шеќерот и растителните масла, според Организацијата за храна и земјоделство на Обединетите нации, цитирана од „Reuters“.
Индексот на цените на организацијата, кој ги мери месечните промени во основната кошница за храна, вклучувајќи житарици, маслодајни семиња, млечни производи, месо и шеќер, во февруари изнесува 116 поени, во споредба со малку ревидираните надолни 113,2 поени во јануари.
Организацијата во соопштението вели дека глобалната берба на жито останува на пат да достигне годишен рекорд во 2020-та година, со рани индикатори кои покажуваат дека ќе има зголемување на производството и оваа година.
Индексот на цените на житото на организацијата се зголеми за 1,2% на месечно ниво во февруари. Меѓу главните крупнозрнести сорти, соргото е најскап со 17,4% месечно и со дури 82,1% годишно, благодарение на силната побарувачка во Кина.
Цените на пченката и оризот исто така растат, додека оние за извоз на пченица остануваат релативно стабилни.
Цените на шеќерот се зголемија за 6,4% на месечно ниво, поради загриженоста за снабдувањето во 2020-2021 година, бидејќи производството во поголемите земји се намали, а побарувачката во Азија остана силна. Индексот на цените на растителните масла порасна за 6,2% и го достигна највисокото ниво од април 2012-та година, со палминото масло кое расте деветти месец по ред.
Цените на млечните производи се зголемија за 1,7%, а индексот за месо за поумерени 0,6%.
Организацијата за храна и земјоделство ја зголеми прогнозата за бербата на житото во 2020-та година на 2,761 милијарди тони од 2,744 милијарди тони еден месец порано, што претставува зголемување од 1,9% на годишно ниво. Промената се одразува на очекуваното зголемување на производството на пченица од 7,5 милиони тони по неодамна објавените податоци од Австралија, Европската унија, Казахстан и Русија.
Прогнозата за производство на ориз исто така се зголемува за 2,6 милијарди тони како резултат на зголемените очекувања за жетвата во Индија.
Организацијата исто така соопшти дека очекува светското производство на пченица да се зголеми во 2021-ва година трета година по ред со нов рекорд од 780 милиони тони.
