Бидејќи движењето на цената на биткоинот и достигнувањето на нови рекордни вредности сè уште е меѓу главните вести на многу медиумски куќи, оваа криптовалута привлекува се повеќе инвеститори секој ден. Сепак, крипто-почетниците не истражуваат долго пред да се впуштат во рударење или да инвестираат во биткоин, открива неодамнешната студија на софтверската компанија “Кардифај”.
Податоците собрани од 750 инвеститори во истражувањето спроведено од 5 до 12 февруари, при кое цената на еден биткоин порасна од 37 000 на 47 000 долари, покажува дека само 16,9 проценти од инвеститорите кои ја купиле оваа дигитална валута „целосно ја разбираат“ вредноста и потенцијалот на криптовалутата, додека 33,5 проценти од купувачите или не знаат ништо за оваа област или нивното ниво на знаење е „во зачеток“, пренесува CNBC.
Сепак, недостатокот на знаење или разбирање не ги спречи да ја купат таа виртуелна валута.
Истражувањето открива дека повеќе од 40 проценти од сите набавки на крипто валути потекнуваат од нови инвеститори. Ова делумно допринесе на растечкиот тренд на прифаќање на биткоинот како платежно средство. Во изминатите два месеци, и PayPal и компанијата за финтек Square, ја додадоа на нивните платформи за плаќање преку Интернет.
Резултатите од истражувањето, исто така покажуваат дека многу нови инвеститори во акцијата биле мотивирани од страв да не ја испуштат можноста за заработка. Повеќе од една третина од испитаниците истражувале дигитални валути помалку од еден месец пред купувањето, а секој четврти клиент рекол дека тоа го сториле во надеж дека ќе профитираат на краток рок.
Обемот на инвестиции во криптовалути во јануари годинава беше 23 пати поголем од 2019 година, наведува Кардифaj, каде просечната сума на износот за купување се зголемил на 1.212 долари, во споредба со само 432 долари истиот месец во 2020 година.
Излез од овој вид инвестиции – односно продажба на крипто средствата – учествувало со 26,8 проценти во вкупните трансакции, што е намалување во споредба со учеството од 43,1 процент во 2019 година, кога еден биткоин вредеше нешто повеќе од 3.000 долари.
Но, не само што метеорскиот пораст на биткоинот привлече нови инвеститори во крипто-сферата, туку играа улога и позитивните коментари на јавните личности.
Од испитаните 750 инвеститори, нешто помалку од 180 изјавиле дека гледаат попозитивно на доџкоинот и сега имаат поголема веројатност да ги вложат своите пари во него, благодарение на бројните твитови на извршниот директор на Тесла, Илон Маск и неговите 48 милиони следбеници.
Всушност, твитовите на Маск за доџкоинот, кои потекнуваат од мемото, помогнаа да стане трета најпопуларна крипто валута меѓу испитаниците, од кои 8,0 проценти ја имаат таа валута. Биткоин и етериум, чија вкупна пазарна капитализација е над еден трилион долари, сè уште се најпопуларни.
Сепак, инвеститорите немаат целосна доверба во крипто валутите. Повеќе од половина од испитаниците се согласуваат во одговорот дека нивната најголема грижа е загубата на пари поради изразената волатилност на цените на виртуелните валути, се заклучува во извештајот на Кардифај.
Коментари