Атлантик Група оствари раст на профитабилноста (со исклучок на еднократните ставки) со споредливи приходи на минатогодишно ниво и рекордно ниско задолжување
Операциите на Атлантик Група покажаа високо ниво на стабилност во текот на 2020 година и покрај нарушувањата предизвикани од пандемијата КОВИД 19. Компанијата оствари 700,3 милиони евра приходи од продажба, што претставува пад од 3,3 проценти во споредба со 2019 година, но ако се исклучи влијанието на деинвестираниот* оперативен приход, споредливите приходи останаа практично на истото ниво од минатата година со благ пад од 0,4 проценти. Добивката пред камати, даноци и амортизација (EBITDA) изнесуваше 95,5 милиони евра и беше пониска за 8 проценти, додека без еднократни ставки порасна за 4,6 проценти, на 100,7 милиони евра. Нето добивката изнесуваше 45,6 милиони евра и без еднократни ставки порасна за 13,3 проценти во споредба со претходната година, додека номинално бележи пад од 12,3 проценти.
„Стабилната финансиска позиција, оптимизацијата на деловните процеси и квалитетното стратегиско управување ни овозможија да го одржиме деловниот континуитет и сигурноста на работните места, активно да се вклучиме во помагање на заедницата во борбата против корона вирусот и да ја подобриме профитабилноста со минимални негативни ефекти врз консолидираните приходи и рекордно ниска задолженост. И покрај кризата, ние продолживме да правиме планирани инвестиции за развој на бизнисот. Нашите приоритети и покрај неизвесноста на епидемиолошката состојба остануваат исти – одржување на позитивен билтен за здравјето на нашите вработени, обезбедување на непречен процес на производството, континуирано снабдување на нашите клиенти и потрошувачи и општествена одговорност во најширока смисла. Горд сум на начинот на кој се справуваме со предизвиците, свесен сум дека ја имаме привилегијата да работиме во индустрија која не е толку погодена од пандемијата. Со задоволство можам да кажам дека денес сме подобра компанија во секој поглед отколку што бевме една година порано. Светот во кој живееме се менува и нашите напори се насочени кон тоа да бидеме и да останеме релевантни“, вели Емил Тедески, претседател на Управниот одбор на Атлантик Група.
Најголем раст забележаа Аргета, Фармација и Донат
Најголем раст на приходите од продажба меѓу деловните области постигнаа Деликатесните намази со раст од 15,1 проценти, ланецот аптеки Фармација со раст од 4,5 проценти и Донат МГ со раст од 2,7 проценти. Кафето се издвојува како најголема поединечна категорија со учество од 21,1 процент во вкупните приходи, а во 2020 година оствари благ пад на приходите од 2,6 проценти, со зголемување на профитабилноста. Кај пазарите, најзначаен раст од 14,2 проценти остварија клучните европски пазари, претежно Австрија и Швајцарија, а продолжија да растат и пазарите на Словенија, Македонија и Косово.
На резултатот значајно влијаеле мерките за спречување на ширењето на пандемијата и слабата туристичка сезона во Хрватска, што посебно се одрази на пад на продажбата во Хорека сегментот (пијалоци и кафе), но и во пад на продажбата на производи наменети за консумација надвор од домот т.н. импулсивни производи (примарно слатки и солени производи). Сепак, брендовите кои првенствено се консумираат дома, успеаја комплетно да ги анулираат негативните влијанија предизвикани од пандемијата. Вреди да се истакне дека освен влијанието од пандемијата врз приходите, резултатите на компанија беа оптеретени со 5,1 милиони евра еднократни трошоци за донации (3,7 милиони евра) и други оперативни трошоци поврзани со спречување на пандемијата.
Наградите потврдуваат дека Атлантик чекори во вистинската насока
Покрај кризата, годината ја одбележаа и бројни признанија и награди. Во 2020 година, Атлантик Група беше прогласен за петти најпосакуван работодавач во Хрватска според истражувањето на компанијата МојПосао, и најпосакуваниот работодавач за младите во Србија во категоријата храна и пијалоци. Од друга страна, Цедевита, според истражувањето на Ипсос во 2020 година, е најбараната марка безалкохолни пијалоци во Хрватска и Словенија, а втора во Србија. На 12-тото доделување на наградите „Фина“, Атлантик ја освои титулата најуспешен долгорочен претприемач, додека на 11-тото доделување на наградите, во организација на Пословни Дневник и Загребската берза, ја освои првата награда за односи со инвеститори. На крајот на годината, Атлантик издаде корпоративни обврзници во износ од 40 милиони евра со фиксна годишна каматна стапка од 0,875 проценти, што е историски најниска каматна стапка постигната во нефинансискиот сектор на хрватскиот пазар на капитал.
Во 2021 година, компанијата ќе продолжи да се фокусира на зајакнување на позицијата на препознатливи регионални брендови, интернационализација (првенствено Аргета и Донат), создавање нови брендови, развој на деловна дистрибуција и продолжување на дезинвестирање на нестратешки деловни операции и можни спојувања и преземања.
