Пандемијата со Ковид-19 може да ги продлабочи разликите во Европа доколку владите не се справат со светската здравствена криза и не ја поддржат економијата се додека не заврши кризата, предупреди шефот на Меѓународниот монетарен фонд (ММФ).
Кристалина Георгиева ги пофали владите во ЕУ поради над 3 трилиони евра фискална поддршка на компаниите и домаќинствата, вклучително и програмите за зачувување на работните места во кои беа вклучени над 54 милиони работници.
„Но, патот до закрепнување … е нерамномерен … поради разликите во почетните позиции, економската структура и можностите за акција, што предизвикува продлабочување на нееднаквостите меѓу земјите и во самите нив“, предупреди Георгиева на конференција во Европскиот парламент.
Така, земјите од ЕУ кои традиционално се потпираат на туризмот, како што се Шпанија, Грција и Италија, забележаа пад на БДП-то за повеќе од девет проценти во 2020-та година, додека во Унијата падна во просек за 6,4 проценти.
„Според предвидувањата на ММФ, до крајот на 2022-ра година, приходот по глава на жител во Централна и Источна Европа треба да биде за 3,8 проценти понизок од предвидуваниот период пред кризата, во споредба со застојот од само 1,3 проценти во развиените економии на ЕУ“, рече Георгиева.
Според ММФ, Ковид ќе ја продлабочи нееднаквоста во земјите, така што регионите кои имале помал БДП по глава на жител пред кризата, помала продуктивност, поголем сектор кој се потпира на директен контакт со клиенти и помалите бизниси погодени од работата од далечина.
Губењето на милиони работни места најмногу ќе ги погоди жените и младите, особено оние со пониски примања и заштеди, објаснува Георгиева.
Вакцинацијата ‘рбетoт на економската политика
Според тоа, владите на ЕУ мора да создадат услови за економско закрепнување и ублажување на диспаритетите, ставајќи го крајот на здравствената криза.
„Вакцинацијата е столбот на економската политика во оваа година, како во Европа, така и во светот. Додека не ја победиме пандемијата насекаде, ризикуваме нови мутации што го загрозуваат нашиот напредок”, рече таа, повикувајќи на соработка во финансирањето набавката на вакцините и дистрибуцијата.
Владите исто така мора да продолжат да ги поддржуваат деловните субјекти и домаќинствата сè додека не се потисне пандемијата.
„Поддршката мора да се укине по трајно излегување од здравствената криза, а не пред тоа“, нагласи таа, бидејќи во спротивно разликите меѓу земјите ќе се продлабочат.
На долг рок, најважно е координација на зелените и дигиталните инвестиции, додаде таа.
„Нашата анализа покажува дека тоа може да го зголеми годишниот раст на глобалниот БДП за околу 0,7 проценти во период од 15 години, создавајќи нови работни места“, рече таа.
Минатата година ЕУ се согласи заеднички да позајми 750 милијарди евра и да ги потроши преку грантови и меки заеми за реформи и зелени и дигитални инвестиции што ќе го зголемат потенцијалниот раст на најранливите земји.
