Тајван ја зголеми прогнозата за економски раст за 2021-ва година. Владата очекува бруто домашниот производ на земјата да расте со најбрзо темпо во последните седум години, пренесува „CNBC“.
Тековната прогноза е за раст на БДП-то од 4,64% на годишно ниво, што би бил најсилниот раст од 2014-та година.
Една од главните причини за пооптимистичките очекувања е поврзана со растот на глобалната побарувачка за чипови. Тајван е еден од главните извозници на овие електронски компоненти.
Претходната владина прогноза во Тајван беше за раст од 3,8% во 2021-ва година, во споредба со пријавената во 2020-та година (според прелиминарните податоци) од 3,11 проценти.
Минатата година, економијата на Тајван беше најсилна во цела Азија, надминувајќи ја Кина за прв пат во последните 30 години.
Извозот на земјата во 2020-та година се зголеми за 4,9 проценти. До одреден степен, позитивно влијаеше на ситуацијата околу пандемијата, бидејќи Ковид-19 принуди милиони луѓе ширум светот да работат и да се забавуваат од дома. Ова доведе до остар скок на побарувачката за електронски уреди.
Во 2021-ва година, извозот се очекува да порасне со уште посилна стапка на над 9,5 проценти.
Домашната побарувачка во земјата исто така се одвива подобро отколку во многу други економии во регионот, благодарение на брзиот одговор на локалните власти и релативно раната контрола на ширењето на коронавирусот.
Тајван, со 23 милиони жители, досега регистрирал 942 случаи на Ковид-19. Бројот на починати од коронавирусот во земјата е само девет, според локалниот Центар за контрола на заразни болести.
Во 2021-ва година, сепак, од Тајван не се очекува повторно да ја надмине Кина во економскиот раст. Според сегашните прогнози на Меѓународниот монетарен фонд, кинеската економија ќе порасне за 8,1% во 2021-ва година.
