Денес, 18 февруари 2021 година, Центарот за граѓански комуникации (ЦГК) ги објави истражувањето и базата на податоци на трошоците за зимско одржување на патиштата за сезоната 2020/21.
За ангажирање на механизација, работници, сол и чакал за чистење и за прскање на улиците во зимски услови, оваа сезона ќе се потрошат 538 милиони денари, односно 8,7 милиони евра.
Тендери за оваа намена имале 41 општина и Градот Скопје, 6 локални јавни претпријатија и државното јавно претпријатие за одржување и заштита на магистралните и регионалните патишта – Македонијапат. Само ова претпријатие има склучено договори за јавни набавки за зимско одржување оваа сезона во вредност од 5,7 милиони евра што е две третини од сите пари што ќе се потрошат за оваа намена.
Договори за зимско одржување на улиците и патиштата на скопските општини
| Институција | Вредност на договорите (во евра) |
| Град Скопје | 697.255 |
| Општина Центар | 138.738 |
| Општина Бутел | 134.309 |
| Општина Карпош | 130.081 |
| Општина Гази Баба | 117.073 |
| Општина Ѓорче Петров | 103.512 |
| Општина Кисела Вода | 48.780 |
| Општина Чаир | 28.780 |
| Општина Аеродром | 25.983 |
| Општина Чучер-Сандево | 19.187 |
| ЈКП Сопиште | 19.187 |
| Општина Арачиново | 17.268 |
| ЈКП Илинден | 13.421 |
| Општина Сопиште | 1.943 |
Градот Скопје сам зимскава сезона планира да потроши 700 илјади евра за чистење на снегот и прскање на улиците, додека заедно со уште осум други скопски градски општини ќе бидат потрошени околу 1,4 милиони евра за зимско одржување на улиците. Од другите општини од земјава, најголема вредност за ова ќе потрошат Битола, Прилеп и Куманово.
Вредност на зимско одржување на улиците и патиштата на другите општини
| Институција | Вредност на договорите (во евра) |
| Општина Битола | 225.643 |
| Општина Прилеп | 195.122 |
| Општина Куманово | 166.121 |
| Општина Тетово | 115.122 |
| Општина Кичево | 115.122 |
Најголем поединечен тендер има склучено Македонијапат со Димакс рудници Сопотница, од речиси седум милиони евра за двогодишно снабдување со сол за патиштата. Набавени се 59.555 тони индустриска сол, по цена од 116 евра по тон, за двегодишно прскање на патиштата.
Ранг-листа на фирми со најголема вредност на договорите за зимско одржување
| Реден број | Фирма | Број на договори | Вредност на договорите (во евра) |
| 1 | Димакс рудници Сопотница, Д. Хисар | 4 | 7.520.342 |
| 2 | Ган-Логистик Тетово | 10 | 1.169.641 |
| 3 | Аполо Инженеринг | 1 | 1.055.285 |
| 4 | Јоскатранс Трејд Д. Хисар | 2 | 597.245 |
| 5 | Дикор ЦГ Струмица | 2 | 559.992 |
Покрај оваа фирма, која вкупно има 4 тендери во вредност од 7,5 милиони евра, меѓу фирмите со највредни договори се и Ган-Логистик од Тетово со 1,2 милиони евра и скопски Аполо Инженеринг со 1 милион евра.
Конкуренцијата на овие тендери била многу ниска, односно просечно имало само по 1,5 понуди на тендер или на две третини од тендерите (64 %) имало само по една понуда. Вкупната сума на трошоци за зимско одржување сигурно ќе биде и поголема ако се има предвид дека за шест тендери сѐ уште не се објавени склучените договори и нивните износи.
