Единственото нешто што можат да го направат најпопуларните туристички дестинации во Јужна Европа за 2021-ва година е само да се подготват и да се надеваат.
Вакцинациите против коронавирусот веќе започнаа, но ќе поминат месеци пред да се достават доволно дози за луѓето да се вратат во животот пред пандемијата. Ова значи дека во голема мера бизнисот не може да ги оправда очекувањата за летната сезона во оваа година, пишува „Bloomberg“.
Само се очекува дека сезоната сега ќе биде подобра отколку во 2020-та година. Само три крстаречки брода пристигнаа на грчкиот остров Санторини во минатата година, во споредба со скоро 600 во 2019-та година. Бројките на Европската комисија објавени во петокот покажуваат дека посетите на Италија, Шпанија и Грција падна за најмалку 70%.
„Туристичките текови генерално се очекува целосно да се опорават до нивото пред кризата во 2021-ва година“, рече Комисијата.
Пандемијата ги става сопствениците на хотели, кои сè уште имаат трошоци за одржување и изнајмување работна сила без гаранција за приход, во тешка ситуација.
„Треба да бидеме подготвени без да знаеме дали можеме да отвориме. Но, не можеме да ги оставиме подготовките во последен момент“, рече Манолис Карамолегос, кој е сопственик на „Meltemi Hotels and Resorts“ во Санторини и е претседател на локалното здружение на хотелиери.
Туризмот е клучен за многу делови на Јужна Европа. Претставува 21% од грчката економија и 17% од економијата на Португалија. Често е главен работодавач во региони каде што недостасуваат други индустрии, обезбедувајќи приходи за семејства и поддршка за локалните економии.
Изгледите ќе се подобрат со продолжување на вакцинациите, бидејќи одложената побарувачка ќе доведе до повеќе спонтани резервации.
Дури и ако има скок на резервациите во последен момент, придобивките нема да бидат распределени рамномерно. Според Европската комисија, луѓето ќе претпочитаат дестинации дома или близу со автомобил.
Во меѓувреме, како што кампањата за имунизација на Европската унија напредува полека и контроверзно, владите бараат можности за помош на туризмот.
