Италијанската централна банка очекува раст на економијата на пролет, иако постојаната загриженост за Ковид-19 влијае врз потрошувачката, рече гувернерот на банката Игнасио Виско, цитиран од „Bloomberg“.
Пролетното закрепнување „во голема мера зависи од постепеното олеснување на пандемијата во наредните месеци“, рече Виско, кој е исто така член на управниот одбор на Европската централна банка. Изјавата ја даде на годишниот настан „Assiom-Forex“. „Студиите спроведени од италијанската централна банка кон крајот на ноември покажуваат дека трошоците за потрошувачка се задржуваат поради загриженост за Ковид, над мотивот на претпазливост заснован на економски и политички размислувања.
Италија беше силно погодена од пандемијата на коронавирусот и забележа повеќе од 90.000 смртни случаи од Ковид-19. Ефектите од вирусот доведоа до многу поголем економски пад отколку во другите европски земји, и покрај стимулациите од над 130 милијарди евра.
Производството минатата година падна за 8,9%, соопшти Националниот институт за статистика. Во исто време, долгот скокна на скоро 160% од бруто домашниот производ.
Потрошувачки трошоци
„Студија на Централната банка на Италија покажува дека учеството на домаќинствата кои очекуваат да потрошат помалку од годишниот приход во следните 12 месеци е зголемен. Само 20% од семејствата кои очекуваат да се намалат нивните приходи велат дека ќе заштедат. Сепак, треба да почнеме да размислуваме како да ги намалиме мерките за поддршка без да им наштетиме на семејствата и економијата“, рече Виско.
„Потребата да се обезбеди заштита на работниците и да се спречи излегувањето на здрави компании од пазарот мора да се усогласи со потребата да не се меша во автоматската прераспределба на ресурсите на компаниите и секторите со најголем потенцијал за раст“, рече тој.
„Овој процес е потребен за да се промовираат придобивки од ефикасноста, кои се од суштинско значење за економскиот раст“, истакна Виско.
Тој исто така рече дека ниските каматни стапки и добрата употреба на средствата од фондот за реконструкција на Европската унија ќе помогнат да се зајакне растот и да бидат клучни за финансиското управување во Италија. Во текот на следните неколку години, земјата ќе добие 209 милијарди евра финансирање од ЕУ.
