Куба објави дека приватното претприемништво е дозволено во повеќето сектори, што е значајна реформа за комунистичката земја во чија економија доминира јавниот сектор.
Мерката, која ја најави министерката за труд Марта Елена Феито во август, беше одобрена во петокот за време на седницата на Советот на министри, објави весникот „Гранма“, официјалниот весник на владејачката Комунистичка партија.
Приватното претприемништво во Куба е дозволено од 2010 година, но ограничено на само неколку сектори назначени од државата.
Голем раст на претприемништвото е забележан од 2014 година, по историското подобрување на односите меѓу Куба и Соединетите Американски Држави под власта на Барак Обама, пренесува агенцијата Франс прес.
„Елиминирана е претходната листа со 127 дозволени активности“, рече министерот.
Отсега, на списокот ќе бидат само секторите резервирани за државата, наместо дозволените активности.
„Од вкупно 2.000 активности, само 124 ќе бидат делумно или целосно ограничени“, рече Феито. Таа не откри за кои сектори станува збор, но се претпоставува дека станува збор за индустрии важни за државата, како што се медиумите, здравството и одбраната.
„Целта на оваа реформа е приватното претприемништво да продолжи да се развива“, потенцира министерката.
Во моментов, повеќе од 600.000 Кубанци работат во приватниот сектор, или 13 проценти од работната сила на островската држава, која има 11,2 милиони жители.
Повеќето се вработени во секторите на угостителство, транспорт и туризам, секторите најтешко погодени од санкциите на поранешниот американски претседател Доналд Трамп и пандемијата на коронавирусот.
Министерот за економија Алехандро Гил на Твитер напиша дека новата реформа е „важен чекор кон зголемување на вработеноста“.
Овие се „добри вести“ и „чекор во вистинска насока“, дури и ако „за жал, требаше премногу долго за да се одобри“, напиша Рикардо Торес, економист од Универзитетот во Хавана.
