Инфлацијата во еврозоната беше минус 0,3 проценти на годишно ниво во декември, останувајќи во негативна територија четврти месец по ред, објави Заводот за статистика на ЕУ, „Евростат“.
Во истиот месец во 2019-та година, стапката на раст на потрошувачките цени во монетарниот блок со 19 члена беше 1,3 проценти, на годишно ниво. Од друга страна, декемвриската инфлација во Европската унија го забрза растот на 0,3 проценти од ноемвриското ниво од 0,2 проценти. Една година порано, тоа беше 1,6 проценти.
Најниски стапки на инфлација на годишно ниво се регистрирани во декември во Грција (минус 2,4 проценти), Словенија (-1,2) и Ирска (-1), додека највисоки се регистрирани во Полска (3,4 проценти) и Унгарија (2,8 проценти) и Чешка (2,4).
Во споредба со ноември, инфлацијата падна на годишно ниво во девет земји-членки на ЕУ, остана стабилна во осум, додека порасна во десет земји.
Најголем придонес за годишната стапка на инфлација во еврозоната имаше услужниот сектор (плус 0,3 процентни поени), проследено со храна, алкохолни пијалоци и тутун (+0,25 п.п.), неенергетските индустриски производи (-0,14 п.п.) и енергија (-0,68 п.п.), се наведува во соопштението на „Евростат“.
Коментари