Баронот Бенџамин де Ротшилд, кој беше шеф на семејна компанија позната низ целиот свет, почина на 57-годишна возраст од последици од срцев удар.
Аријана де Ротшилд и нејзините ќерки со длабока тага ја објавија смртта на нивниот сопруг и татко Бенџамин де Ротшилд, по срцевиот удар во семејната куќа во Прегни, Швајцарија, на 15 јануари 2021 година“, се вели во соопштението на семејството на богатиот наследник.
Замокот Прегни, понекогаш наречен замок Ротшилд, каде што банкарот ги минал последните часови, се наоѓа во близина на Женевското езеро. Имотот припаѓа на семејство од средината на 19 век.
Роден на 30 јули 1963 година, Бенџамин де Ротшилд беше син на Едмонд и Надин де Ротшилд.
Од 1997 година, тој беше шеф на компанијата основана од неговиот татко во 1953 година, како и претседател на бордот на директори на Едмонд де Ротшилд Холдинг СА, специјализиран за приватно банкарство и управување со средства.
Во соопштението на веб-страницата на компанијата се вели дека Бенџамин „го развил својот бизнис на исклучителен начин во текот на сите овие години и бил активен филантроп“.
Тој беше експерт за финансии и иновации и се сметаше за личност која секогаш се трудеше максимално да ги искористи своите способности и ресурси.
Групацијата Едмонд де Ротшилд е банкарска компанија која управува со средствата и капиталот на меѓународни клиенти и организации. Има 32 канцеларии ширум светот кои управуваат со имот вреден 160 милијарди евра. Компанијата вработува 2.600 работници, пренесува „Jerusalem Post“.
Со лични средства во вредност од 4,3 милијарди евра, Ротшилд важи за 22-от најбогат човек во Франција.
