Производителот од Штутгарт може донекаде да биде задоволен со глобалниот резулат од продажбата во минатата година, со оглед дека забележа минимален пад.
Како и повеќето автомобилски компании, и „Porsche“ ја заврши 2020-та во минус, но падот на продажбата изнесуваше само 3%.
На купувачите ширум светот им беа испорачани 272.162 возила од овој производител, додека една година претходно беа продадени рекордни 280.800 автомобили.
„Cayenne“ беше најбараниот модел на „Porsche“ со 92.860 продадени примероци, додека за најпознатиот модел на овој производител – „911“ се определиле 34.328 купувачи.
Сепак, најзабележителен продажен резултат постигна електричниот „Taycan“. Во својата прва целосна година на пазарот, овој модел на струја пристигна на адресите на 20.015 сопственици.
„Taycan“ според продажбата се изедначи со вкупниот резултат на „Porsche 718 Boxster“ и „Cayman“ (вкупно 21.784 примероци).
И покрај глобалниот пад на продажбата во 2020-та, производителот од Штутгарт забележа раст на некои од важните пазари, како што се Кина, Блискиот исток и Африка.
