Британските регулатори издадоа експлицитно предупредување до потрошувачите кои сакаат да го искористат новиот крипто „бум“: „Бидете подготвени да изгубите сè“, пишува „Bloomberg“.
„Инвестирањето во криптовалути или инвестиции и кредити поврзани со нив обично вклучува преземање многу високи ризици за парите на инвеститорите“, се вели во соопштението на Агенцијата за финансиско однесување (Financial Conduct Authority – FCA).
„Доколку потрошувачите инвестираат во вакви видови производи, тие мора да бидат подготвени да ги загубат сите свои пари, предупредија регулаторите.
Загриженоста на „FCA“ вклучува нестабилност на цените, сложеност на понудените производи и недостаток на регулатива за заштита на потрошувачите за многу производи.
Цената на биткоинот, најголемата криптовалута во светот, се зголеми за повеќе од четири пати во изминатата година, предизвикувајќи спомени за манијата од 2017-та година, кога крипто-валутите пораснаа за прв пат пред цените да паднат исто толку брзо.
Вртоглавата трка на биткоинот во понеделникот доби поинаков тек откако дводневниот пад на вредноста ги загрижи инвеститорите дека „бумот“ можеби изгубил интензитет.
Најголемата криптовалута според пазарната капитализација падна за 18% во неделата и понеделникот, достигнувајќи 33.500 американски долари. Ова е најголемото дводневно намалување од мај минатата година и го следеше рекордниот раст на скоро 42.000 долари на 8-ми јануари.
Во вторникот, биткоинот успеа да врати дел од изгубеното во неделата и понеделникот со пораст од 7,7% до 34.286,67 долари.
Во утринава, цената на биткоинот продолжува да опаѓа за скоро 3% до 34.029,11 долари.
Според поборниците на биткоинот, овој пат разликата е во тоа што се повеќе и повеќе институционални инвеститори се заинтересирани за средството и тој се повеќе се перципира како засолниште од ослабувањето на доларот и ризикот од инфлација. Сепак, според други, падот нема добра причина, тој е поттикнат од фискални и парични стимулации, а самиот биткоин никогаш нема да биде сигурна валутна алтернатива.
