Со блокирање на профилите на Фејсбук, Инстаграм и Твитер, Трамп ги загуби главните канали за комуникација со своите приврзаници.
Социјалната мрежа Твитер во петокот објави дека трајно го суспендирала профилот на американскиот претседател Доналд Трамп поради ризик од натамошно поттикнување на насилство.
По деталниот преглед на неодамнешните твитови од профилот @realDonaldTrump и содржината околу него, трајно го суспендиравме тој профил поради ризик од понатамошно поттикнување на насилство, објави компанијата.
Во средата, Твитер привремено го блокираше профилот на Трамп, кој има повеќе од 88 милиони следбеници, по опсадата на Капитол Хил од демонстрантите, предупредувајќи потоа дека следните прекршувања на правилата на платформата ќе резултираат со трајно суспендирање на профилот на претседателот.
Белата куќа досега не коментираше ништо.
Претходно во четвртокот, социјалните мрежи Фејсбук и Инстаграм одлучија да ја продолжат суспензијата на профилот на американскиот претседател Доналд Трамп најмалку уште две недели додека не заврши трансферот на власта на новиот претседател Џо Бајден. Одлуката уследи откако Фејсбук одлучи да го затвори профилот на Трамп на 24 часа за да ги запре неоснованите обвинувања на Трамп за кражба на претседателските избори што ги натера стотици негови приврзаници да упаднат во зградата на Конгресот.
Најновата одлука на Твитер следеше по двата твита објавени од Трамп во петокот, кои ќе бидат последни на таа социјална мрежа.
Двата твита ги прекршија правилата на Твитер затоа што го величаа насилството, соопшти социјалната мрежа, додавајќи дека „тие треба да се читаат во контекст на поширокиот развој на настаните во земјата и на некој начин изјавите на претседателот можат да мобилизираат различна публика, вклучително и поттикнување насилство, како на пр. и во контекст на моделот на однесување видлив од неговиот профил во последните неколку недели“.
Првиот твит на Трамп беше за неговите приврзаници. 75.000.000.000 американски патриоти кои гласаа за мене, America First и Make America great again, ќе имаат силен глас долго во иднината. Ќе се почитува и нема да се третира неправедно на кој било начин или форма!!!.
Другиот твит се однесуваше на фактот дека Трамп не планира да присуствува на инаугурацијата на новиот претседател Џо Бајден.
Твитер соопшти дека твитот за инаугурацијата може да се сфати како дополнителна изјава дека изборите не биле легални, а исто така може да се толкува како Трамп да кажува дека инаугурацијата ќе биде „сигурна“ мета за насилство затоа што тој нема да биде присутен.
Друга изјава за американските патриоти сугерира дека „тој планира да продолжи да ги поддржува, зајакнува и штити оние кои веруваат дека победил на изборите“, посочува Твитер.
Трамп на тој начин го губи својот моќен мегафон на социјалните мрежи.
Коментари