Цената на биткоинот за прв пат во историјата ја надмина границата од 40.000 американски долари, оставајќи ја вкупната пазарна вредност на сите криптовалути на над 1 трилион долари, што е скоро половина од вредноста на „Apple“.
Претходно, вредноста на биткоинот достигна 40.367 американски долари – неколку часа по преминувањето на границата од 39.000 американски долари, според „Coin Metrics“.
Следуваше продажба, со што се намали вредноста на најпопуларната криптовалута на 38.885 долари, што е за 9,1 процент повеќе од пред 24 часа.
Биткоинот додаде 30% на вредноста од почетокот на 2021-ва година, како и над 400% во последните 12 месеци.
Чамат Палихапитија од „Social Capital“ смета дека на дигиталната валута и претстои долг пат, и покрај сериозната апрецијација во последната година.
„Со голема веројатност, вредноста на биткоинот ќе достигне 100.000 американски долари, потоа 150.000 американски долари, а потоа 200.000 американски долари“, изјави тој за „CNBC“.
„Не можам да кажам во кој период ќе се достигнат овие цени, можеби 5 или 10 години“, додаде тој.
Денес, биткоинот има пазарна капитализација од 724 милијарди долари, што ја прави најпопуларна криптовалута, привлекувајќи го вниманието на се повеќе и повеќе големи инвеститори, како што е Пол Тудор Џонс.
Многу од инвеститорите кои веруваат во криптовалути веруваат дека биткоинот е „дигитално злато“, или средство што може да не заштити во услови на инфлација.
Од „JP Morgan“ дури пред извесно време рекоа дека на долг рок цената може да се искачи на 146.000 долари.
