Република Северна Македонија во февруари ќе ги добие првите дози од вакцината на „Фајзер“, соопшти министерот за здравство, Венко Филипче, на социјалните мрежи.
„Денеска попладне е постигнат директен договор со компанијата, а количината ќе биде позната во текот на следните недели. Следните дози од вакцината на ‘Фајзер’ ќе пристигнат во март и април“, нагласува Филипче.
Тој воедно додава дека Министерството за здравство продолжува разговори за обезбедување вакцини и преку преговори со земјите членки на ЕУ, како и преку Ковкакс-механизмот, од каде што се очекуваат распоредот и датумот за дистрибуција на првите количини.
„Ова е одлична вест за сите граѓани и прв чекор кон конечна победа над пандемијата“, вели министерот, кој додава и дека во текот на јануари се очекуваат и фрижидерите за складирање на вакцините и со тоа македонскиот здравствен систем ќе биде целосно подготвен за вакцинацијата.