Коронавирусот пристигна и на Антарктикот, единствениот континент каде досега не беа регистрирани случаи на Ковид-19, објави чилеанското Министерство за одбрана.
Чилеанската армија објави дека 36 лица биле заразени во истражувачката станица Бернардо О’Хигинс, од кои 26 војници и 10 работници, и сите биле евакуирани и пренесени во Чиле, пренесува Би-Би-Си.
Веста беше објавена три дена откако Чилеанската морнарица објави дека се регистрирани три случаи на инфекција со Ковид-19, меѓу членовите на екипажот на бродот што го снабдува персоналот на истражувачката станица.
Бродот „Сарџендо Алдеа“ пристигна во истражувачката станица на 27 ноември, а на 10 декември пловеше за Чиле. По пристигнувањето во пристаништето Талкахуано, утврдено е дека тројца членови на екипажот биле позитивни на вирусот.
Бернардо О’Хигинс е една од четирите постојани истражувачки станици што ги има Чиле на Антарктикот и сите ги управува војската.
