Силиконската долина е епицентар на технолошката индустрија со децении, почнувајќи во 1938 година кога Бил Хјулит и Дејвид Пакард започнаа да работат во гаражата во Пало Алтo.
Но, тоа може да се промени неповратно. Можеби највпечатлив доказ за ова е веста дека потомокот на компанијата што ја основаа, HP Enterprise (HPE), ќе го пресели своето седиште во Тексас.
Минатата недела, уште еден долгогодишен жител на Силиконската долина, Oracle, објави дека ќе го премести своето седиште во Остин, Тексас.
Исто така, голем број реномирани технолошки инвеститори и директори го напуштаат Сан Франциско. Минатата недела основачот на Тесла, Илон Маск, откри дека се преселил во Тексас откако претходно оваа година го продаде својот недвижен имот во Бел Ер.
Оваа промена беше донекаде очекувана за време на пандемијата кога повеќето луѓе работат од дома. Неколку технолошки компании изјавија, дека ќе им дадат на вработените можност да работат трајно од дома дури и по завршувањето на пандемијата.
Но, преместувањето на седиштето на компании, основачи на компании и големи инвеститори укажува на корпоративна дијаспора на технолошката индустрија и на она што некои го нарекоа „технолошки егзодус“ од Заливот.
Некои кои веќе го напуштија Сан Франциско се пожалија на властите и на нивното лошо управување со градот и државата. Имено, Калифорнија воведе строги мерки за сузбивање на Covid-19, за што некои луѓе од технолошкиот свет, особено Маск, немаа пофални зборови. За споредба, Флорида и Тексас применија нешто помалку строги ограничувања.
Силиконската долина има и енормно високи цени на недвижнините. А, Калифорнија има висока стапка на данок на доход, за разлика од Флорида и Тексас.
Каде се селат компаниите?
Веста дека технолошките компании се селат во Тексас, особено во Остин, не е револуционерна. Технолошкиот центар, наречен „Silicon Hills“, веќе е дом на лидерите во индустријата, вклучувајќи ги и компаниите Advanced Micro Devices, Dell и други.
Според Стопанската комора на Остин, до месец ноември, 39 компании од технологијата и другите индустрии се преселиле во Остин. Меѓу нив се и 8VC, која е водечка американска инвестициска компанија, водена од коосновачот на софтверската компанија Palantir, Џо Лондсдејл. Тесла, исто така, гради објект од 4 милиони квадратни метри во близина на Остин, што треба да создаде 5000 нови работни места, според податоците на Комората.
Иако не е технолошка компанија, производителот на електронски цигари Juul Labs минатата година ги премести канцелариите од Заливот во Остин.
Градоначалникот на Мајами, Франсис Суарез, исто така ја искористи можноста да привлече повеќе големи компании во областа и јавно ги повика компаниите да се преселат.
На почетокот на овој месец, основачот на Reddit, Алексис Оханијан и сопруг на познатата тенисерка Серена Вилијамс, изјави дека се преселил од Сан Франциско на Флорида пред неколку години.
„Луѓето беа шокирани. Тие прашаа како ќе правиме бизнис од Јужна Флорида. „Три години подоцна, мојот деловен живот се одвива прилично добро“, рече Оханиан.
Американската инвестициска банка Goldman Sachs, со седиште во Њујорк, наводно планира да премести некои свои операции во Мајами.
Кој ја напушта Силиконската долина?
Еве краток преглед на некои од големите технолошки компании и милијардери кои објавија дека оваа година се селат во Тексас:
Hewlett Packard Enterprises (HPE): Компанијата објави дека планира да го премести своето седиште од Сан Хозе во Тексас. Најголемиот центар за вработување на оваа компанија се наоѓа во Хјустон, а компанијата гради и нов кампус во градот.
Oracle: Oracle го преместува своето седиште од Редвуд во Остин, иако планира да го задржи присуството во Калифорнија. „Сметаме дека овие потези прават најдобра позиција на Oracle за раст и им даваат на нашите вработени поголема флексибилност во тоа каде и како работат“, рече Дебора Хелинџер, ПР на компанијата.
Илон Маск: Извршниот директор на Тесла минатата недела откри дека тој веќе се преселил од Калифорнија во Тексас. Тој претходно на Твитер предложи седиштето на Тесла да биде преместено во Тексас, што сè уште се нема случено, но компанијата развива голема фабрика во близина на Остин.
8VC: Компанијата на Лондсдејл го преместува своето седиште од Силиконската долина во Остин. „Стана навистина очигледно дека има многу места за градење низ целата земја, не само во Силиконската долина, заради трошоците за живот, талентот и културата и што уште не“, му рече Лондсдејл на американскиот државник од Остин минатиот месец.
Дру Хјустон: Извршниот директор на Dropbox купи куќа во Остин и планира трајно да се пресели таму.
FileTrail: Поранешна фирма со седиште во Сан Хозе, која произведува софтвер за адвокатски фирми, се пресели во Остин оваа година во април.
DZS Inc.: Компанијата за телекомуникациска опрема објави во март дека ќе го премести своето седиште од Оукленд, Калифорнија во Плано, Тексас и ќе создаде нов инженерски центар во градот.
QuestionPro: Оваа фирма за анкетирање на интернет најави премин од заливот во Остин во јануари.
Компании и милијардери кои неодамна се преселија на Флорида
Дејвид Блумберг: Основачот и управувачки партнер на „ Blumberg Capital“ се пресели од заливот во Мајами. „Секако се надеваме и се молиме Калифорнија да преземе чекори за да ја поправи катастрофалната политичка ситуација што ја создаде и да го врати својот поранешен сјај и квалитет на живот“, рече Блумберг.
Кит Рабојс: Рабојс, генерален партнер во Founders Fund и поранешен извршен директор на PayPal и LinkedIn, минатиот месец изјави дека го напушта заливот и заминува во Мајами.
Џо Оринџер: Основачот и извршен директор на Shutterstock и поранешен жител на Њујорк купил вила на плажа во Мајами во октомври за 42 милиони долари. Во тоа време, Оринџер ја основаше Pareto Holdings, компанија чија цел е да инкубира и да инвестира во стартапи на технолошката сцена во Мајами.
