Американската маркетинг компанија Omnikom и француската Publicis објавија дека ќе се спојат во една најголема маркетинг компанија во светот, со вредност од 35.1 милијарди долари.
Сегашниот извршен директор на Omnikom Џон Рен и неговиот колега од Publicis Морис Леви, заеднички ќе ја водат компанијата.
Акционерите на двете компании ќе имаат по околу 50 проценти од акциите на новата Publicis Omnikom Group. Сите постојни акционери на Publicis ќе добијат за секоја акција од компанијата специјална дивиденда од едно евро, додека сите сопственици на Omnikom добиваат за секоја акција 0.813 акции од новата компанија, плус бонус од два долари, како и квартален бонус на дивиденда.
Врз основа на финалната цена на 26 Јули 2013 година, Publicis Omnicom Group ќе влезе на пазарот со капитал од околу 26.5 милијарди евра.
Новата компанија ќе вработи повеќе од 130.000 луѓе и ќе се појави на берзите во Њујорк и Париз.
Се очекува дека евентуалното спојување ќе биде завршено до март 2014 година, како што пренесува Би-Би-Си.
Ова значи дека како клиенти во една компанија ќе се најдат Кока-Кола (Coca-Cola Co), Пепси (Pepsi Co), Мекдоналдс (McDonalds), Џам Брендс (Yum Brands, сопственик на брендот KFC), Тако Бел (Taco Bell) и други.
Publicis Omnicom Group ги вклучува меѓународните светски агенции, како што Leo Burnett, BBDO, Saatchi & Saatchi, DDB, TBWA, Publicis Worldwide, Ketchum, StarcomMediaVest, OMD, BBH, MSLGROUP, ZenithOptimedia и многу други.
