Компанијата „Microsoft“ веќе некое време е поборник за технологија без лозинки, нагласувајќи дека сака да исчезнат традиционалните и несигурни лозинки. Компанијата инвестираше во различни решенија во изминатите неколку години, како што се „Windows Hello“, „Microsoft Authenticator“, безбедносни клучеви „FIDO2“ и систем за потврда на идентитетот преку вените на дланката, меѓу другото.
Сега компанијата ги истакна чекорите што ги презеде за да се намали употребата на лозинки во текот на 2020-та година и изјави дека планира да ги направи лозинките минато за сите свои корисници во 2021-ва година.
„Microsoft“ откри дека скоро 80% од сите сајбер напади имаат за цел лозинки, а една од 250 корпоративни сметки е компромитирана секој месец поради ова. Компанијата затоа се обидува да ги пренесе луѓето на решенија без лозинки. Во ноември 2019-та година, 100 милиони луѓе ја користеа услугата на „Microsoft“ без лозинка. Тој број се искачи на 150 милиони до мај 2020-та година, што покажува дека милиони луѓе се подготвени да ги отфрлат лозинките.
Во текот на 2020-та година, „Microsoft“ учествуваше на разни конференции за споделување на својата визија за иднината без лозинка и за опкружувањето „Zero Trust“. Компанијата соработуваше со неколку безбедносни партнери во „Microsoft Intelligent Security Association“ (MISA) за да работи на решенија без лозинка.
„Microsoft“ планира да ги направи лозинките непотребни за корисниците на нејзините услуги до 2021-ва година. Компанијата во моментов развива нови „API“ и „UX“ за управување со безбедносните клучеви „FIDO2“, а исто така има за цел да испорача „портал за конвергирана регистрација“ каде што корисниците ќе можат да управуваат со своите податоци без лозинка.
